Субҳи имрӯз, 1-уми май, дар ҳудуди ноҳияи Айнӣ мошини тамғаи “Старекс” ба садама дучор шуда ва дар натиҷаи он 6 нафар ҳалок ва 3 зану кӯдак маҷрӯҳ гардидаанд. Дар ин бора Кумитаҳои ҳолатҳои фавқулода (КҲФ) иттилоъ медиҳад.
Ба гуфтаи манбаъ, ин ҳодиса тақрибан соати 4:00 субҳи имрӯз дар километри 154-уми шоҳроҳи Душанбе-Хуҷанд-Чаноқ рух додааст.
“Наҷотдиҳандагони КҲФ дар минтақаи Зарафшон ба ҷойи ҳодиса ҳозир шуда, маълум карданд, ки ронандаи автомашинаи тамғаи “Старекс” ҳангоми ҳаракат аз маркази ноҳияи Айнӣ ба самти шаҳри Панҷакент идораи воситаи нақлиётро аз даст дода, ба самти ҷарии 200 метра мошинро сарозер кардааст”, – омадааст дар хабар.
Тавре КҲФ менависад, наҷотдиҳандагон бо ёрии техникаи кӯҳӣ ба дара фуромада, ҷасади ронанда ва панҷ мусофирро аз мошин берун оварда, ба мақомоти ҳифзи ҳуқуқ супурданд.
Ҳамин тавр, 3 нафар – 2 кӯдак ва 1 занро бо ҷароҳатҳои гуногун ба бемористони ноҳияи Айнӣ бурданд.
Ному насаби ҳалокшудагон ва маҷрӯҳон зикр карда намешавад.
Гуфта мешавад, ки ҳоло наҷотдиҳандагон паёмадҳои садамаи маргбор дар шоҳроҳи Душанбе-Хуҷанд-Чаноқро бартараф кардаанд.
Дар робита ба ин, КҲФ бори дигар ба ронандагон хотиррасон мекунад, ки ҳарчи бештар эҳтиёткор бошанд ва тамоми қоидаҳои ҳаракати роҳ, инчунин меъёри суръатро риоят кунанд.
