Иттиҳоди Аврупо (ИА) умедвор аст, ки бо роҳи дипломатӣ кишварҳои Осиёи Марказӣ (ОМ)-ро муътақид месозад, ки дар канорагирӣ аз таҳримҳо ба Русия кумак накунанд, изҳор дошт раиси Шӯрои Аврупо Шарл Мишел зимни нишасти матбуотӣ аз рӯи натиҷаҳои нишасти “Осиёи Марказӣ – Иттиҳоди Аврупо”, ки дар шаҳри Чолпон-Ота баргузор шуд, хабар медиҳад Фергана.
“Мо аллакай нисбати онҳое, ки мошини низомии Русияро дастгирӣ мекунанд, тадбирҳои зиёд рӯйи даст гирифтем. Ҳозир бастаи 11-уми таҳримҳоро баррасӣ дорем, то ки хавфи канорагирӣ аз онҳоро коҳиш диҳем. Аммо возеҳ гуфтанӣ нестам, ки мо ҳеҷ гуна чораҳои ғайридавлатиро татбиқ намекунем, ки ин махсусан муҳим аст, мо мехоҳем бо ҳама шарикони худ дар саросари ҷаҳон танҳо тавассути муколама кор кунем”, – гуфтааст Шарл Мишел (тарҷумаи ТАСС).
Раиси Шӯрои Аврупо хотиррасон намудааст, ки намояндаи махсуси ИА оид ба таҳримҳо Дэвид О'Салливан ба Осиёи Марказӣ фиристода шуд, ки “имконият дошт бо намояндагони ҳамаи давлатҳои минтақа вохӯрда, тамоми масоили марбут ба таҳримҳоро баррасӣ намояд, то ки аз як тараф шарикони моро бовар кунонад, ки ба Русия барои канорагирӣ аз таҳримҳо кумак накунанд, аз тарафи дигар, аз онҳо оқибатҳои таҳримҳои моро шунавад”.
Қаблан расонаҳо навишта буданд, ки аз тариқи ИДМ ба Русия маҳсулоти зиёди истеҳсолшуда дар ИМА, Ҷопон ва Аврупо, аз смартфонҳо то мошинҳо ворид карда мешаванд. Масалан, тавре О’Салливан хабар дод, то охири соли 2022 содироти мол аз ИА ба Қирғизистон 300% ва аз рӯи баъзе намудҳо – технологияҳои пешрафта ва молҳои таъиноти дугуна – 700% афзоиш ёфтааст.
Аз Қазоқистон ба Русия назар ба як соли қабл тақрибан 2 млрд доллар бештар мол фиристода шуд. Дар ҳамин ҳол, дар 8 моҳи соли 2022 интиқоли смартфонҳо 88 маротиба ва мониторҳо беш аз 300 баробар афзоиш ёфтааст. Агар дар соли 2021 Қазоқистон ба Русия ба маблағи 12 ҳазор доллар нимноқилҳои пешрафта содир карда бошад, соли 2022 ин нишондиҳанда ба 3,7 млн доллар расидааст.
Шарл Мишел зимни суханронӣ пас аз нишаст таъкид дошт, ки Иттиҳоди Аврупо шарики боэътимод ва пешбинишаванда барои Осиёи Марказӣ буда, ҳамкориҳояш дар дурнамои дарозмуддат пешбинӣ мешавад.
«Кишварҳои узви ИА бузургтарин манбаи сармоягузории мустақими хориҷӣ дар минтақа мебошанд, ки беш аз 40%-и сармоягузориҳои мустақими хориҷӣ ба онҳо рост меояд. Мо бо чанд кишвари Осиёи Марказӣ созишномаҳои шарикӣ баста, ҳамкориҳои густарда дорем. Ва онҳо имкон доранд, ки ҳамкориҳои дуҷонибаи моро ба сатҳи нав бароранд”, – гуфтааст роҳбари Шӯрои Аврупо.
Дар нишасти “Осиёи Марказӣ – Иттиҳоди Аврупо”, ки рӯзи 2 июн доир гардид, раиси Шӯрои Аврупо Шарл Мишел, сарони чор кишвари минтақа – Қосим-Жомарт Токаев (Қазоқистон), Садир Жапаров (Қирғизистон), Эмомалӣ Раҳмон (Тоҷикистон) ва Шавкат Мирзиёев (Ӯзбекистон), инчунин муовини сарвазири Туркманистон Нурмухаммет Аманнепесов ширкат варзиданд.
Қобили зикр аст, ки аввалин вохӯрии сарони кишварҳои Осиёи Марказӣ ва раиси Шӯрои Аврупо Шарл Мишел 27 октябри соли 2022 дар шаҳри Остона баргузор шуда буд.
