Дар робита ба сафари Эмомалӣ Раҳмон, Президенти Тоҷикистон ба баъзе шаҳру ноҳияҳои вилояти Суғд, аз 5-ум то 8-уми июл ҳаракати нақлиёт дар роҳҳои ин минтақа маҳдуд карда мешавад.
Дар ин бора Шӯъбаи БДА дар вилояти Суғд бо ирсоли мактуб ба расонаҳои маҳаллӣ иттилоъ додааст.
Шӯъбаи БДА дар вилояти Суғд нақшаи маҳдудияти ҳаракати воситаҳои нақлиёт ҳангоми ташрифи меҳмононро эълон карда, таъкид намудааст, ки он дар вақтҳои алоҳида ҷорӣ карда мешавад.
Ҳамин тавр:
– 5-уми июли соли 2023 ҳаракати воситаҳои нақлиёт дар роҳи автомобилгарди Айнӣ – Панҷакент, кӯчаҳои марказии ҷамоати Урметани ноҳияи Айнӣ, шаҳраки Суғдиён то деҳаи Филмандари шаҳри Панҷакент маҳдуд карда мешавад.
– 6-уми июли соли 2023 ҳаракати нақлиёт дар кӯчаҳои марказии шаҳри Гулистон, роҳи автомобилгарди Хуҷанд – Бобоҷон Ғафуров, кӯчаҳои Исмоили Сомонӣ – Рифъат Ҳоҷиев – 25-солаги Истиқлолият – Султон Умаров – Сирдарё то тавалудхонаи шаҳри Хуҷанд, давраи Ором, ҷамоати Дадобой Холматов то шаҳри Гулистон маҳдуд мегардад.
– 07-уми июли соли 2023 ҳаракати нақлиёт дар кӯчаҳои марказии ноҳияи Масчоҳ, ҷамоатҳои Навбунёд, Полдорак, Оббурдон то деҳаи Масчоҳи ноҳияи Масчоҳ маҳдуд мешавад.
– 08-уми июли соли 2023 ҳаракати нақлиёт дар кӯчаҳои марказии шаҳри Гулистон – роҳи автомобилгарди Хуҷанд – Бобоҷон Ғафуров, кӯчаҳои Гагарин – Бобоҷон Ғафуров то маҳаллаи Нави шаҳри Бӯстон, кӯчаҳои Исмоили Сомонӣ – Солеҳ Раҷабов ва Раҳмон Набиеви шаҳри Хучанд маҳдуд карда мешавад.
Дар робиба ба ин, Шӯъбаи БДА дар вилояти Суғд аз сокинон ва шаҳрвандон хоҳиш кардааст, ки ҳангоми маҳдуд шудани ҳаракат дар мавзеъҳои зикргардида, ҳаракати худро тариқи кӯчаҳои ҳамшафат идома диҳанд.
Бояд гуфт, ки пагоҳ, 5-уми июл, Эмомалӣ Раҳмон, Президенти Тоҷикистон сафари кории худро ба вилояти Суғд аз минтақаи Зарафшон оғоз мекунад ва дар назар аст, ки баъдан ба дигар шаҳру ноҳияҳои ин вилоят ташриф орад.
