“Бонки миллии Тоҷикистон (БМТ) ба сифати яке аз қарздиҳандагони “Тоҷпромбонк” барои барқарор намудани ҷараёни барҳамдиҳии ташкилоти мазкур ба мақомоти судӣ муроҷиат кард”, – хабар дод зимни нишасти матбуотӣ дар Душанбе муовини якуми раиси Бонки миллӣ Фирдавс Толибзода.
Ӯ зикр кард, ки “Тоҷпромбонк” бояд уҳдадориҳои боқимондаашро дар назди қарздиҳандагон иҷро кунад.
Ба гуфтаи Толибзода, ташкилоти мазкур дороиҳоеро дар ихтиёр дорад, ки аз ҳисоби онҳо бояд маблағи саҳмгузоронро баргардонад.
Қаблан рӯзи 7 август раиси Суди олии Тоҷикистон Рустам Мирзозода дар нишасти матбуотӣ дар ин робита хабар дод, ки “дар асоси таъиноти Суди иқтисодии шаҳри Душанбе, баррасии парвандаи муфлисшавии “Тоҷпромбонк” аз 1-уми августи соли 2023 қатъ карда шудааст. Яъне муҳлат тамдид карда нашудааст”.
Додраси Додгоҳи иқтисодии шаҳри Душанбе Зулфия Саидзода, ки қарори муфлисшавии “Тоҷпромбонк”-ро имзо кардааст, иброз намуд, ки парвандаи муфлисшавӣ ҳудуди 7 сол баррасӣ гардид (3-юми марти соли 2017 оғоз шуда буд) ва дар ин муддат 5 ҳазору 726 нафар беш аз 148 млн. сомонӣ маблағи амонати худро, ки дар бонк буд, бозпас гирифтанд.
Ба қавли номбурда, амонатгузороне, ки маблағи худро гирифта натавонистанд, низ то ҳол ҳастанд.
“Бегумон, як қисми амонатгузорон мондагӣ ҳастанд. Бинобар сабабе, ки моликияту дороиҳо баҳснок буданд, додгоҳ аз қабули қарор худдорӣ кард. “Тоҷпромбанк” ҳам имконият надошт, ки ба амонатгузорон маблағи нақд диҳад”, – гуфт Зулфия Саидзода.
Дар ҳамин ҳол, Фирӯз Шарипов, мудири махсус ва барҳамдиҳандаи “Тоҷпромбонк” аз Бонки миллии Тоҷикистон дар суҳбат бо “Азия-Плюс” муфлисшавии бонкро тасдиқ кард ва гуфт, 169 нафар то ҳол ба маблағи 26,6 млн сомонӣ маблағи худро гирифта натавонистаанд.
Дар ҳоли ҳозир, ба гуфтаи ӯ, мурофиаи муфлисшавии бонк ба охир расидааст ва то мурофиаи дигар, ки маълум нест кай баргузор мешавад, маблағи амонатгузорон баргардонида намешавад.
Раванди муфлисшавии “Тоҷпромбонк” моҳи марти соли 2017 бо қарори Додгоҳи иқтисодии шаҳри Душанбе оғоз гардида буд. Қарори бозхонди иҷозатномаи бонк рӯзи 24-уми феврали соли 2017 аз сӯи Бонки миллии Тоҷикистон содир гардид.
Амволи бонк дар маҷмӯъ 450 млн. сомонӣ ва ҳаҷми умумии уҳдадориҳои он наздики 550 млн. сомонӣ арзёбӣ мешуд.
Додгоҳи ноҳияи Синои шаҳри Душанбе раиси пешини “Тоҷпромбонк” Ҷамшед Зиёевро бо чаҳор банди Кодекси ҷиноятӣ гунаҳкор дониста, ӯро ба 8,5 соли зиндон маҳкум кард.
