Президенти Тоҷикистон Эмомалӣ Раҳмон имрӯз сафари кории худро ба вилояти Хатлон оғоз намуд, ки он то 21 октябр идома меёбад.
Тавре ки хадамоти матбуоти сарвари давлат хабар медиҳад, сафари кории президен аз ноҳияи Фархор оғоз шуда, дар ин ҷо ӯ дар маросими ба истифода додани дидбонгоҳи сарҳадии “Кокул” иштирок кард.
Ҳамчунин Эмомалӣ Раҳмон тавасути таҷҳизоти видеоӣ – онлайнӣ дидбонгоҳҳои сарҳадиро дар ноҳияҳои Лахш, Шамсиддин Шоҳини вилояти Хатлон, ноҳияҳои Рӯшон, Ишкошим, Мурғоб ва шаҳри Хоруғи ВМКБ ба истифода супорид.
Гуфта мешавад, дар маҷмуъ имрӯз дар сарҳади Тоҷикистон 24 дидбонгоҳи сарҳадӣ ва 96 манзили истиқоматӣ барои афсарон ба истифода дода шуд, ки дар натиҷа барои 1450 нафар афсарону сарбозон шароити арзандаву шоистаи хизмату зист муҳайё карда шуд.
Дар идома президенти ҷумҳурӣ дар маросими гузоштани санги асос барои бунёди Қасри фарҳанг дар маркази ноҳияи Фархор ширкат варзид. Бинои Қасри фарҳанг 3 ошёна буда, барои 700 ҷойи нишаст пешбинӣ шудааст. Барои сохтмони он 35 млн сомонӣ маблағгузорӣ мешавад.
Сипас сарвари давлат аз ҶДММ «Маркази тиббии Саломат» боздид намуд. Барои сохтмон ва муҷаҳҳаз гардонидани ин марказ 10 млн сомонӣ сарф шудааст.
Ҳамчунин Эмомалӣ Раҳмон дар Ҷамоати деҳоти Фархор бинои ҶДММ “Маркази ташхисию табобатии Ориёно”-ро мавриди баҳрабардорӣ қарор дод. Сохтмони бинои марказ ҳанӯз соли 2021 оғоз гардида, аз таҳхона, панҷ ошёна ва болохона иборат аст.
Дар ҶДММ “Маркази ташхисию табобатии Ориёно” 34 нафар, аз ҷумла 6 табиб, 14 корманди миёнаи тиббӣ ва 12 нафар корманди ёрирасон ба кор ҷалб шудаанд. Барои фаъолияти пурсамари ин маркази тиббӣ бо арзиши 12 миллион сомонӣ таҷҳизоти муосири тиббӣ харидорӣ ва васлу насб карда шудааст.
Дар ноҳияи Фархор Эмомалӣ Раҳмон бо 100 нафар ятими кулл аз ноҳияҳои Фархор, Балҷувон, Муъминобод, Темурмалик, Мир Саид Алии Ҳамадонӣ ва Шамсиддин Шоҳин мулоқот намуда, ба онҳо туҳфаҳо тақдим кард.
Дар идомаи сафари корӣ дар ноҳияи Фархор президент аз Хоҷагии деҳқонии боғпарварии “Боғи Нодир” боздид карда, бо нашъунамои шолӣ дар кишти такрорӣ, ҷамъоварии ҳосили пахта, фаъолияти гармхона ва сардхона бо ғунҷоиши 1000 тонна шинос ва аз намоиши маҳсулоти кишоварзӣ боздид кард.
Дар хоҷагӣ, ки дорои 160 гектар буда, 80 саҳмдор дорад, дарахтони гуногуни мевадиҳанда парвариш ёфта, сабзавоту зироатҳои гуногун кишт карда мешавад.
Сафари кории сарвари давлат ба вилояти Хатлон идома дорад.
