Дар шаҳри Душанбе Осорхонаи Ҳабибулло Абдураззоқов, Ҳунарпешаи халқии Тоҷикистон ва коргардони шинохтаи тоҷик ифтитоҳ шуд. Мо аз ин осорхонаи нав боздид карда, гузориш таҳия намудем.
Осорхона аз ду толори бузург, хонаҳои дарунӣ ва кати чойнӯшиву ҷойи истироҳат иборат аст. Ин ҷо китобҳо, либосҳо, аксҳо, каллексияҳои ҷамъоварда ва дигар ёдгориҳо аз шодравон гирд оварда шудаанд. Ва ин ҳам, гуфта мешавад, танҳо аз се як ҳиссаи ёдгориҳои ҳунарманданд.
Осорхонаи мазкур бо ташаббуси фарзандони ҳунарманд дар хонаи нав ва бо тарҳи муосир таҳия шудааст ва зертобеи ягон ниҳоди давлатӣ нест. Пайвандони Ҳабибулло Абдураззоқов мегӯянд, Осорхона хусусӣ ё худ ҷамъиятӣ боқӣ мемонанд, вале пешниҳоде ҳам ҳаст, ки он ба тобеияти Академияи милллии илмҳо ва ё Вазорати фарҳанг дохил карда шавад.
Ҳабибулло Абдураззоқов 7-уми ноябри соли 1937 дар Кӯлоб ба дунё омада, 19-уми январ соли 2021 дар 83-солагӣ дар Душанбе аз олам даргузашт. Марҳум беш аз 50 сол дар театру синамои тоҷик хидмат намуда ва номашро дар саҳифаҳои санъату фарҳанг ҳаккокӣ кард.
