Академияи миллии илмҳои Тоҷикистон дар мавриди тахриби нимпайкараи Абдулло Раҳимбоев аз майдони “Ситораҳои Хуҷанд” ва иваз кардани номи гӯшаи ба номи Абдулло Раҳимбоев дар Осорхонаи таърихии вилояти Суғд пешниҳодҳои худро ироа кардааст.
Насрулло Убайдулло, директори Институти таърих, бостоншиносӣ ва мардумшиносии ба номи А. Дониши АМИТ зимни нишасти матбуотӣ гуфт, ки онҳо дар мавриди нимпайкара ва гӯшаи Абдулло Раҳимбоев ба хукумати шаҳри Хуҷанд ва вилояти Суғд мактуб ирсол карда, назари олимони АМИТ-ро гуфтааст.
“Мо дар ҳарду маврид ҳам гуфтем, ки будани нимпайкара ва номгузорӣ шудани як гӯшаи Осорхона ба номи Абдулло Раҳимбоев кори номатлуб аст”, – гуфт Насрулло Убайдулло.
Гуфтан ба маврид аст, ки нимпайкараи Абдулло Раҳимбоев дар майдони “Ситораҳои Хуҷанд”-и шаҳри Хуҷанд гузошта шудааст ва таърихдонон, олимон ва фаъолони ҷомеаи шаҳрвандӣ борҳо пешниҳод кардаанд, ки он нимпайкара бардошта шавад.
ИЗОБРАЖЕНИЕ Насрулло Убайдулло
Ёдовар мешавем, ки Абдулло Раҳимбоев зодаи Хуҷанд аст, вале чун инқилобчии пантуркист шинохта шудааст. Ба қавли муҳаққиқон, “Абдулло Раҳимбоев исбот кардан мехост, ки дар Осиёи Миёна тоҷикон вуҷуд надоранд ва соли 1924 дар тақсимоти милливу марзӣ зидди таъсиси Тоҷикистон буд”.
