Дар Тоҷикистон намояндагони 80 халқият зиндагӣ мекунанд, вале роҳбарияти Агентии омори кишвар теъдоди дақиқи онҳоро расонаӣ накард.
Ҷамшед Нурмаҳмадзода, раиси Агентии омор, имрӯз, 14-уми феврал, зимни нишасти матбуотӣ гуфт, баъди барӯйхатгирии аҳолӣ дар соли 2020 маълум шуд, ки дар Тоҷикистон намояндагони 80 халқ зиндагӣ мекунанд.
Ӯ афзуд, дар кишвар 86 дарсад тоҷикон ва 11 дарсад ӯзбекҳо ба қайд гирифта шудаанд. Дар зинаҳои баъдӣ русҳову яҳудиҳову тоторҳо ва дигар халқҳо меистанд. Ӯ аз гуфтани дигар халқҳои дар Тоҷикистон зидагидошта худдорӣ кард.
Нурмаҳмадзода гуфт, ки омори пурраро танҳо пас аз чопи китоби Натиҷаҳои барӯйхатгирии аҳолӣ дастрас мекунед, “зеро ҳар кор қонуну қоида дорад”.
ИЗОБРАЖЕНИЕ Ҷамшед Нурмаҳмадзода
Ёдовар мешавем, ки бори охир дар Тоҷикистон соли 2020 барӯйхатгирии аҳолӣ гузаронида шуд ва натиҷаи он бояд дар давоми 4 сол дастраси истифодабарандагон мегардид.
Аз ин пештар, соли 2010 дар Тоҷикистон барӯйхатгирии аҳолӣ гузаронида шуда буд. Дар ин графикаи мо метавонед бо таркиби аҳолии Тоҷикистон дар солҳои 1989 ва 2010 шинос шавед.
