Агар Ҳамос ҳамаи гаравгонҳоро дар Ғазза раҳо накунад, Исроил рӯзи 10-уми март ба шаҳри Рафаҳ, ки дар ҷануби ин канора ҷойгир аст, ҳамла хоҳад кард. Дар ин бора Бенни Гантз, вазири кобинаи ҳарбии Исроил изҳор дошт.
Ба гузориши Би-би-сӣ, Исроил барои нахустин бор санаи мушаххаси амалиёт дар Рафаҳро, ки ҳудуди 1,5 миллион фаластинӣ дар он ҷо паноҳ бурдаанд, зикр кард.
Қаблан Оҷонси беҳдошти СММ хабар дода буд, ки яке аз бемористонҳои калидии Ғазза пас аз вуруди артиши Исроил аз фаъолият бозмондааст. Созмони Ҷаҳонии Беҳдошт гуфт, ки барои арзёбии вазъ ба бемористони Носир дар Хон Юнис дар шимоли Рафаҳ иҷоза дода нашудааст.
Артиши Исроил рӯзи панҷшанбе вориди маҷмааи бемористон шуд ва гуфт, ки гузоришҳои истихборотӣ ҳокӣ аз аз он аст, ки Ҳамос дар он ҷо гаравгонҳоро нигаҳ медорад.
Бенни Гантз, вазири собиқи дифои Исроил, рӯзи якшанбе гуфт: “Ҷаҳон бояд бидонад ва раҳбарони Ҳамос бояд бидонанд, ки агар гаравгонони мо то Рамазон ба ватан барнагарданд, дар ҳама ҷо, аз ҷумла дар минтақаи Рафаҳ, ҷанг идома хоҳад ёфт”.
Рамазон – моҳи барои мусулмонон муборак, дар назар аст, ки 10-уми марти соли ҷорӣ оғоз шавад.
Ёдовар мешавем, ки даргирӣ дар Ғазза рӯзи 7-уми октябри соли 2023 дар пайи ҳамлаи Ҳамос ба Исроил ва куштори 1200 нафару ба гарнаф гирифтани 253 нафар оғоз шуд. Баъди ин Исроил ба Ғазза ҳамла кард ва тибқи иттилои расонаҳои байналмилалӣ ва созмонҳои беҳдоштӣ то кунун беш аз 27 ҳазор нафарро кушт. Аксари кушташудагон занону кӯдакон мебошанд.
Айни ҳол, ҳудуди 130 гаравгон дар Ғазза ҳанӯз дар дасти Ҳамос қарор дорад.
ИЗОБРАЖЕНИЕ Зани фаластинӣ дар Рафаҳ нон мепазад
Бо вуҷуди фишорҳои байнулмилалӣ Бенямин Нетаняҳу, нахуствазири Исроил, қавл додааст, ки барои аз байн бурдани Ҳамос ба Рафаҳ низ ҳамла мекунад.
Миср ва баъзе кишварҳои дигари араб борҳо ҳушдор додаанд, ки ҳамлаи Исроил ба Рафаҳ метавонад бисёре аз фаластиниёнро маҷбур ба фирор ба кишвари ҳамсоя кунад. Арабистони Саудӣ гуфтааст, ки ҳамла ба Рафаҳ “оқибатҳои хеле ҷиддӣ” хоҳад дошт.
Дар миқёси байналмилалӣ аз Исроил даъватҳои зиёде садо медиҳанд, ки аз ҳамла ба Рафаҳ худдорӣ кунанд.
Бо вуҷуди идомаи даргириҳо дар Ғазза, тайи рӯзҳои ахир дар Қоҳира талошҳо барои миёнҷигарии оташбас миёни Исроил ва Ҳамос идома доранд, ҳарчанд миёнаравҳои Қатар гуфтанд, ки пешрафт чандон умедбахш нест.
