Дар Фестивали ҷавонон дар Русия 270 нафар аз Тоҷикистон, аз ҷумла блогерон, овозхонҳо ва варзишгарон иштирок мекунанд. Дар ин бора ба “Азия-Плюс” аз Кумитаи кор бо ҷавонон ва варзиши ҷумҳурӣ хабар доданд.
Бино ба иттилои манбаъ, миёни иштирокчиён ҳамчунин 30 нафар кӯдакон ҳам ҳузур доранд.
“Номзадҳо тариқи озмуни махсуси онлайн интихоб шуда, дар натиҷа барои иштирок дар ин чорабинӣ зиёда аз 2,8 ҳазор нафар худро ба қайд гузоштанд”, – иброз дошт манбаъ.
Сафари ҳайати Тоҷикистон рӯзҳои 28 ва 29 феврал ба нақша гирифта шудааст. Фестивал аз 1 то 7 март баргузор мешавад.
Дар Фестивал зиёда аз 20 ҳазор ҷавонони пешсафу муваффақ дар соҳаи тиҷорату расонаҳо, илму маориф, варзиш ва ғайра гирдиҳам меоянд.
Ҳадафи Фестивал дарёфти роҳҳои ҳамдигарфаҳмӣ сарфи назар аз миллату андешаҳои сиёсӣ ва махсусиятҳои фарҳангӣ унвон шудааст.
“Фестивал як таҳкурсие барои дӯстӣ ва ғанисозии мутақобилаи фарҳангӣ, инчунин расму оинҳои халқҳои гуногун хоҳад шуд”, – зикр карданд дар Кумита.
