Парлумони Тоҷикистон 11-уми апрел лоиҳаи Қонуни Ҷумҳурии Тоҷикистон “Оид ба ворид намудани тағйиру иловаҳо ба Қонуни Ҷумҳурии Тоҷикистон “Дар бораи ҳизбҳои сиёсӣ”-ро баррасӣ ва қабул кард, ки тибқи он минбаъд ҳизбҳои сиёсии Тоҷикистон аз буҷети кишвар пул мегиранд.
Дар ин бора нашрияи “Садои мардум” хабар медиҳад.
Музаффар Ашӯриён, вазири адлияи кишвар, зимни муаррифии лоиҳаи қонуни мазкур гуфт, лоиҳаи тағйирот ба қонун бо мақсади таҳкими низоми бисёрҳизбӣ, шаффофияти фаъолияти ҳизбҳои сиёсӣ, беҳтар гардидани мақоми кишвар ҳамчун давлати демократӣ дар арсаи байналмилалӣ таҳия ва пешниҳод гардидааст.
“Мутобиқи лоиҳаи қонуни пешниҳодгардида ба моддаи 12 сархати нав илова гардида, тибқи он яке аз манбаъҳое, ки маблағҳои ҳизбҳои сиёсӣ аз он ташаккул меёбанд, буҷети давлатӣ, дар ҳолатҳои пешбининамудаи қонуни мазкур, мешавад”, – зикр кард Ашӯриён.
Ба қавли вазир, ба қонуни мазкур моддаи нав (моддаи 121) илова гардида, тибқи он аз рӯйи натиҷаҳои иштирок дар интихоботи вакилони Маҷлиси намояндагони Маҷлиси Олии Ҷумҳурии Тоҷикистон даъвати нав як маротиба бо мақсади дастгирии молиявии ҳизбҳои сиёсӣ аз буҷаи давлатӣ маблағгузорӣ мешаванд.
Ин қонун ихтисоси маблағ аз буҷети давлатӣ, дар кадом муҳлат ба суратҳисоби ҳизби сиёсӣ гузарондани маблағ, талаботи маблағгузорӣ, андозаи маблағгузорӣ ва дигар шартҳоро мушаххас мекунад.
Мутобиқи он, маблағгузории давлатии ҳизбҳои сиёсии дар интихобот иштирокдошта, ки ҷамъи овозҳои интихобкунандагони ба тарафдории он додашуда аз 5 дарсади овозҳои интихобкунандагони дар овоздиҳӣ иштироккарда кам намебошад, аз рӯи натиҷаҳои интихоботи вакилони Маҷлиси намояндагони Маҷлиси Олии Ҷумҳурии Тоҷикистон даъвати нав ба маблағи 7 дарсади нишондиҳанда барои ҳисобҳо зарб ба шумораи овозҳои гирифтаи ҳизби сиёсӣ амалӣ мешавад.
Гуфтан ба маврид аст, ки як нишондиҳанда барои ҳисобҳо дар кишвар ҳоло 72 сомонӣ муқаррар шудааст.
Абдуҳалим Ғаффорзода, вакили парлумон аз Ҳизби сотсиалист, қабули тағйирот ба қонунро заруру саривақти дониста, зикр карда, ки “агар ҳизбҳои сиёсӣ маблағи кофӣ надошта бошанд, барномаҳои худро дар амал татбиқ карда наметавонанд”.
Рустам Латифзода, вакили парлумон аз Ҳизби аграрӣ, таъкид кардааст, ки ин тағйирот “ба ҳизбҳои сиёсии мамлакат имкони иловагӣ медиҳад, ки бо намояндагӣ аз тарафдорону пайравони худ дар мақоми олии намояндагӣ ва қонунгузории кишвар фаъолияти густурда дошта бошанд ва дар тамоми соҳаҳои ҳаёти сиёсӣ, иқтисодӣ ва иҷтимоӣ нақши муассир гузоранд”.
Ёдовар мешавем, ки айни ҳол дар Тоҷикистон 7 ҳизби сиёсӣ фаъолият дорад, ки аз он 6 ҳизби сиёсӣ дар парлумони кишвар намоянда дорад.
