Аҳмад Умаров беш аз 50 сол инҷониб ба оҳангарӣ машғул аст ва ин касби аҷдодии ӯ ба ҳисоб меравад: 12 ҷадди гузаштааш ҳам оҳангар будаанд. Ӯ аз оҳангарони маъруф ва собиқадори водии Зарафшон ба ҳисоб меравад ва варо бо номи усто Аҳмад бештар мешиносанд. “Азия-Плюс” аз раванди кор ва шаҷараи оҳангарии ӯ гузориш омода кард.
Аҳмад Умаров соли 1963 дар рустои Ворӯи ноҳияи онвақтаи Панҷакент дар оилаи оҳангар чашм ба олами ҳастӣ боз кардааст ва ба гуфтаи худаш, ин касбро аз падараш омӯхтааст ва аз 8-солагӣ машғули оҳангарист.
Аҳмад Умаров анвои гуногуни асбобро месозад: аз ҷумла корд, табар, теша, метин, каланд, дос, наъл, лос, искана ва ғайра… Пушти дӯкони ӯ ҳамвора харидор аст, ба ӯ барои сохтаи асбобҳои гуногун зиёд фармоиш медиҳанд ва маҳсули дасти ӯ аз Самарқанду Бухоро то Душанбеву Хуҷанду Бохтар талабгор дорад.
Аҳмад Ғолиби ғолиби озмуни ҷумҳуривии “Мисгарӣ ва оҳангарӣ” низ мебошад. Ҳамвора дар намоишгоҳҳои дохилу хориҷи кишвар ширкат мекунад. Ӯ ҳоло дар шаҳраки қадимаи Саразм ҳам дӯкони оҳангарӣ дорад.
Усто то кунун даҳҳо шогирд тарбия кардааст. Ҳоло писараш ҳам ба ин касб машғул аст.
