Дар нимсолаи аввали соли 2024 аз ҷониби кормандони Агентии беҳдошти замин ва обёрии Тоҷикистон ҳудуди 525 ҳазор гектар замин бо об таъмин карда шудааст. Дар ин бора дар сомонаи Агентӣ хабар дода мешавад.
Тибқи дархост ва талабот ба истифодабарандагони об дар ин давра дар ҳаҷми 1,81 млрд.м3, бо арзиши 87,2 млн.сомонӣ об расонида шудааст.
“Дар ин давра ба маблағи 3,5 млн. сомонӣ ҳолати мелиоративии 3788 гектар заминҳо беҳтар гардонида шуда, корҳо дар ин самт идома доранд, зеро бо қарори ҳукумат, имсол беҳтар намудани ҳолати мелиоративии 9811 гектар заминҳои кишоварзӣ бо маблағи 10,3 млн. сомонӣ ба нақша гирифта шудааст”, – омадааст дар хабари Агентӣ.
Ғайр аз ин, корҳои азхудкунии заминҳои нави обёришаванда ва баргардонидани майдонҳои аз гардиши кишоварзӣ баровардашуда низ идома доранд.
Тибқи нақша, то соли 2027 бояд 3410 гектар заминҳои нав азхуд шуда, 900 гектар заминҳои бекорхобида ба гардиши кишоварзӣ дароварда шаванд.
Азхудкунии маблағҳо дар шаш моҳи соли ҷорӣ 8,0 млн. доллари ИМА ё худ 75% нақша ва аз аввали татбиқи лоиҳа 66,6 млн.доллари ИМА ё худ 37%-и нақшаро ташкил медиҳад.
Гуфта мешавад, аз ҳисоби маблағҳои ҳаққи хизмати обрасонӣ бо маблағи 1,2 млн. сомонӣ майдони 1422 гектар, буҷети маҳаллӣ бо маблағи 0,55 млн. сомонӣ майдони 697 гектар, аз ҳисоби хоҷагиҳои деҳқонӣ бо маблағи 1 млн. сомонӣ майдони 1197 гектар замин ва аз ҳисоби лоиҳаҳои инвеститсионӣ бо маблағи 0,68 млн. сомонӣ майдони 401 гектар ҳолати мелиоративии заминҳо беҳ гардонида шуда, корҳо дар ин самт идома доранд.
Дар ҳамин ҳол, бо сабаби саривақт пардохт нашудани хидматрасониҳо, Агентӣ наметавонад қарзи “Барқи тоҷик”-ро ба маблағи 132,7 млн сомонӣ аз истифодаи барқ барои кори пойгоҳҳои обкашӣ пардохт кунад.
Мушкили дигари Агентӣ маоши паст мебошад. Айни замон дар соҳаи беҳдошти замин ва обёрӣ ҳудуди 6 ҳазор нафар машғули кор буда, маоши онҳо ба ҳисоби миёна 879 сомониро ташкил медиҳад. Ин каме зиёдтар аз музди меҳнати минималӣ дар ҷумҳурӣ аст, ки аз 1 июл ба 800 сомонӣ баробар шуд.
Барои беҳтар шудани вазъ Агентӣ аз мақомоти маҳаллӣ даъват намудааст, ки ҷиҳати саривақт пардохт шудани хидматрасониҳо оид ба истифода об тадбирҳо андешида, барои беҳтар гардидани ҳолати мелиоративии заминҳо маблағ ҷудо кунанд.
Ҳамчунин дар Агентӣ бар ин назаранд, ки барои татбиқи барномаҳои давлатии соҳавӣ ва минтақавӣ ҷудо гардидани маблағҳо аз буҷет зарур буда, ҷиҳати ҷалби сармояи хориҷӣ рӯйи даст гирифтани тадбирҳо лозим аст.
