Дар Тоҷикистон айни замон барои дуздии маблағ аз буҷети Вазорати мудофиаи Тоҷикистон нисбати 52 корманди ин Вазорат парвандаҳои ҷиноятӣ оғоз гардидааст.
Тавре ки имрӯз, 9 август зимни нишасти матбуотӣ дар Агентии назорати молиявӣ ва мубориза бо коррупсияи ҷумҳурӣ хабар доданд, парвандаҳои ҷиноятӣ нисбати ин шахсон ҷиҳати баррасии минбаъда ба Суди олӣ фиристода шудаанд. Дар ҳамин ҳол аз ному насаб ва вазифаҳои ин шахсон маълумот дода нашуд.
Зикр шуд, ки зиёни молиявие, ки аз ҷониби айбдоршавандагон расонида шудааст, зиёда аз 123,1 млн сомониро ташкил дода, то ин дам 93 млн сомониаш баргардонида шудааст.
Бино ба маълумоти Агентӣ, соҳаи мудофиа дар зинаи панҷум миёни сохторҳои бештар фасодзада қарор дорад.
Дар нимсолаи аввали соли ҷорӣ дар ҷумҳурӣ ба сурати умум 1267 ҷинояти коррупсионӣ ва иқтисодӣ ошкор шуда, нисбати 694 нафар парвандаҳои ҷиноятӣ оғоз шудаанд.
