Тоҷикистон соли 2023 дар Шохиси ҷаҳонии дониш, ки Барномаи рушди СММ дар ҳамкорӣ бо Бунёди дониши Муҳаммад ибни Рашид ал-Мактум гузаронидааст, байни 133 кишвари ҷаҳон бо касби 36,1 хол зинаи 111-умро ишғол кард.
Ин нишондод миёни кишварҳои Осиёи Марказӣ пасттарин дониста мешавад.
Қазоқистон дар ин рейтинг бо касби 45,6 бал пешсаф буда, дар зинаи 74-ум қарор дорад.
Баъд, Ӯзбекистон бо касби 44,8 дар зинаи 78-ум, Қирғизистон бо гирифтани 44,1 хол дар зинаи 84-ум ва Тоҷикистон бо 36,1 хол дар зинаи 111-ум мавқеъ гирифтанд.
Индекс ҳафт зериндекси таркибӣ, аз ҷумла бахшҳои маориф, ТИК ва иқтисодиёти кишварро фаро мегирад.
Швейтсария бо касби 69,1 хол дар зинаи аввали ин рейтинги ҷаҳонӣ қарор дорад. Ба панҷгонаи беҳтарин кишварҳои Финландия, Шветсия, Нидерландия ва ИМА дохил мешаванд.
Зинаҳои охирро Ҷумҳурии демократии Конго, Нигерия ва Чад ишғол кардаанд.
Соле пеш, дар зинаи аввали ин рейтинг Иёлоти Муттаҳидаи Амрико қарор дошт.
Тоҷикистон дар Шохиси ҷаҳонии дониши Барномаи рушди СММ ва Бунёди дониши Муҳаммад ибни Рашид ал-Мактум дар соли 2021-ум дар зинаи 93-юм қарор дошт.
Тоҷикистон чанд сол аст азм дорад, ки мавқеи худро дар рейтингҳои байналмилалӣ беҳтар кунад. Барои ин як комиссияи доимӣ барои баррасӣ ва арзёбии мавқеи кишвар дар раддабандиҳои байналмилалӣ ҳам бо сардории муовини аввали сарвазири кишвар таъсис дод.
“Азия-Плюс” баъди ду соли таъсисёбии ин комиссия ба мавқеи Тоҷикистон дар рейтингҳои байналмилалӣ назар кард, ки то куҷо беҳтар шудаст. Дар ин пайванд метавонед бо он шинос шавед.
