Дар шаҳри Хуҷанд сохтмони қароргоҳи нави сарвари давлати Тоҷикистон ба нақша гирифта шудааст. Он дар ҷойи қароргоҳи амалкунандаи ҳозира, ки кӯчонида мешавад, қомат меафрозад.
Тавре ки хадамоти матбуоти раиси вилояти Суғд хабар медиҳад, раиси вилоят Раҷаббой Аҳмадзода бо масъулини соҳаи сохтмон, лоиҳакашону меъморон тарҳи нави бинои қароргоҳро баррасӣ кард.
Гуфта мешавад, тибқи лоиҳаи пешакӣ иншоот дорои толорҳои хурду бузург барои гузаронидани чорабиниҳои сатҳи минтақавию байналмилалӣ, мулоқоту вохӯриҳои дуҷониба ва бисёрҷониба, қабули меҳмонон, меҳмонхона ва дигар инфрасохтори зарурӣ хоҳад шуд.
Ба иттилои манбаъ, маҳалли ҷойгиршавии қароргоҳ, ки дар маркази шаҳри Хуҷанд аст, барои қабулу гусели меҳмонон низ мувофиқ мебошад.
Раҷаббой Аҳмадзода зимни шиносоӣ бо тарҳи пешниҳодшуда ба лоиҳакашону меъморон барои омода намудани лоиҳаи биноҳои сохташаванда, саҳн ва атрофи иншоот, ба назар гирифтани санъати меъмории миллӣ дар вақти таҳияи лоиҳа ба масъулин супоришҳои мушаххас дод.
Хадамоти матбуоти раиси вилоят тарҳ (дизайни)-и бинои ояндаро нашр кардааст. Дар робита ба вақти оғози сохтмон, ҳаҷм ва манбаи маблағгузорӣ ҳоло маълумоти мушаххаст дастрас нест.
