Дар Душанбе се нафар мардони қаблан аз ҷониби додгоҳ маҳкумшуда – Ҳамза Валиев, Саидҷамол Каримов ва Наҷбуддин Шарипов боздошт шуданд.
Тавре ки Раёсти ВКД дар шаҳри Душанбе хабар медиҳад, ин дафъа онҳо барои содир намудани ҷинояти ғоратгарӣ дастгир шудаанд.
Гуфта мешавад, номбурдагон худро ҳамчун устои таъмири манзили истиқоматӣ муаррифӣ намуда, сокини 44-солаи шаҳри Душанбе, Маърупов З.-ро дар манзили зисташ латукӯб кардаанд.
“Бо роҳи маҷбурӣ маблағҳои пулӣ ва як адад телефони мобилии ӯро рабуда, ҳамзамон ду адад телевизиорро шикаста, ба ҷабрдида дар умум беш аз 17-ҳазор сомонӣ зарар расонидаанд”, – омадааст дар хабари Раёсат.
Зимнан зикр мегардад, ки ҳодисаи мазкур дар ШВКД-1 дар ноҳияи Шоҳмансур мавриди тафтишот қарор дорад. Аз дигар ҷузъиёти ҳодиса хабар дода намешавад.
Қобили зикр аст, ки дар зарфи 6 моҳи аввали соли равон ҷиноятҳои ғоратгарӣ зиёда аз ду маротиба – аз 5 ҳолат дар соли гузашта то 11 ҳолат дар соли равон зиёд шудааст.
