Дирӯз, 7-уми ноябр дар роҳи Самара-Шимкент як автобуси пур аз мусофир, ки аз Русия ба самти Тоҷикистон ҳаракат мекард, вайрон шудааст. Дар автобус 56 шаҳрванди хориҷӣ, аз ҷумла 4 ноболиғ қарор доштаанд. Дар ин бора Вазорати корҳои дохилии Қазоқистон дар саҳифаи телеграми худ хабар додааст.
Автобуси “Van Hool” дар наздикии деҳаи Калибайи вилояти Актюбински Қазоқистон вайрон шудааст. Кормандони хадамоти роҳ ронанда ва ҳамаи мусофиронро наҷот дода, ба ҷойҳои бехавф бурдаанд. Касе аз мусофирон ҷароҳат набардоштааст.
Сабаби ин ҳодиса номусоидии ҳаво гуфта мешавад. Дар робита ба ин, пулис шабонарӯзӣ ҳаракатро танзим мекунад ва ба ронандагон кӯмак мерасонад.
Дар бораи будани мусофирони тоҷик дар автобус иттилоъ дода намешавад.
Ҳодисаи ба ин монанд, 5-уми ноябри ҳамин сол рух дода буд. Дар роҳи мазкур автобуси шомили 38 мусофир, ки шаҳрвандони Тоҷикистон ва Ӯзбекистон буданд, шикаста буд.
ИЗОБРАЖЕНИЕ
Кормандони хадамоти ҳолатҳои фавқулодаи Қазоқистон мусофиронро ба деҳаи Иргиз кӯчонида, ба онҳо кӯмаки зарурӣ расонида буданд.
Кумитаи ҳолатҳои фавқулодаи Қазоқистон хоҳиш кардааст, ки дар чунин ҳолатҳо ба рақами 112 тамос гиранд.
