Мақомоти тафтишот моддаи айбдорӣ нисбат ба чор гумонбари амали террористӣ дар "Крокус Сити Холл”-ро тағйир дод. Дар ин бора хабаргузории ТАСС бо истинод ба адвокати онҳо Александр Ярин иттилоъ медиҳад.
Ин ҷо дар бораи Исроил, Аминҷон ва Диловар Исломовҳо, инчунин Алишер Қосимов сухан меравад. Ба онҳо мутобиқи моддаи 205.1, қисми 3 Кодекси ҷиноии Русия (ҳамдастӣ дар амали террористӣ, ки дар натиҷаи он амали террористӣ содир шудааст) айбнома пешниҳод шудааст. Мутобиқи ин модда ба айбдоршавандагон ҷазои аз 12 то 20 соли маҳрумият аз озодӣ таҳдид мекунад.
Қаблан ин шахсон мутобиқи моддаи 205, қисми 3, банди “б” КҶ Русия (амали террористӣ, ки ба марги шахс боис шуд) айбдор карда мешуданд. Дар ин модда ҷазои маҳрумият аз озодӣ ба муҳлати аз 15 то 20 сол бо маҳдуд кардани аз озодӣ ба муҳлати аз 1 то 2 сол ё ҳабси абад пешбинӣ шудааст.
Ғайр аз ин, додгоҳ муҳлати дар ҳабс қарор доштани онҳоро то 22 феврали соли 2025 дароз кард.
Тибқи фарзияи мақомоти тафтишот, Исроил Исломов ва ду писари ӯ – Диловар ва Аминҷон аз ниятҳои террористони эҳтимолӣ огаҳӣ доштанд. Ҳамчунин онҳо ба айбдоршавандагон автомашинаи Renault-ро фурӯхтаанд, ки дар рӯзи содир шудани амали террористӣ онҳо бо он равуо дошта, сипас дар вилояти Брянск боздошт шуданд.
Алишер Қосимов бошад, мувофиқи фарзияи тафтишот, ба террористони эҳтимолӣ дар Путилково манзил иҷора додааст. Дар ҷаласаи додгоҳ ӯ изҳор намуд, ки бо онҳо тариқи сомонаи эълонҳо шинос шудааст. Вақти манзилро ба иҷора гирифтан, онҳо гӯиё худро сохтмончиён муаррифӣ кардаанд.
Рӯзи 19 ноябр Додгоҳи Басманнии шаҳри Маскав муҳлати ҳабси чор шаҳрванди Тоҷикистон – Муҳаммадсобир Файзов, Далердҷон Мирзоев, Саидакрам Раҷабализода ва Фаридуни Шамсидинро, ки дар парвандаи амали террористӣ дар “Крокус Сити Холл” гумонбарони асосӣ дониста мешаванд, се моҳ – то 22 феврали соли оянда дароз кард.
Ёдрас мекунем, ки амали террористӣ дар толори “Крокус Сити Холл”-и вилояти Маскав шоми рӯзи 22 март рух дода, бар асари он 145 нафар ҳалок ва зиёда аз 550 кас осеб диданд. Рӯзи дигар, 23 март дар вилояти Брянск 4 нафар гумонбарон боздошт шуданд: Далерҷон Мирзоев, Саидакрам Раҷабализода, Фаридуни Шамсиддин ва Муҳаммадсобир Файзов.
Баъдан боз 7 нафар ҳаммаслакони эҳтимолии онҳо, аз ҷумла бародарон Аминҷон ва Диловар Исломовҳо, падари онҳо Исроил Исломов, инчунин Алишер Қосимов, Лутфулло Назирмад, Ёқубҷон Юсуфзод ва Муҳаммад Шарифзод ба ҷавобгарӣ ҷалб шуданд.
Ба иттилои директори Хадамоти федералии амният (ФСБ), дар доираи ин парванда ҳамагӣ зиёда аз 20 нафар боздошт шуданд, ки аксари онҳо шаҳрвандони Тоҷикистон мебошанд.
Маълумоти бештар дар бораи ин ҳодиса, боздошти гумонбарон ва ҷараёни тафтишотро метавонед дар ин пайванд хонед.
