Милитсияи Суғд тафсилоти кордзании мардеро, ошкор кардааст, ки дар натиҷа, ноболиғи 8-сола захмӣ шуд. Гап сари марде меравад, ки навори ба шиками як духтарча бо корд задани ӯ дар шабакаҳои иҷтимоӣ нашр ва боиси вокуниши зиёди корбарон гардида буд. Ин ҳодиса рӯзи 16-уми феврал дар дохили бозори марказии шаҳри Панҷакент рух дода буд.
Мақомот аз гумонбар Ҷамшед Бобомуллоев ном бурда гуфтааст, ки “дар ҷинояти содиршуда хислати бераҳмӣ ва бадбинӣ нисбати ҷамъият ва ҳаёти инсон ҷой дорад”
“Даруни бозор даромадам, корд гирифтам як духтарча аз пешам мегузашт дар назарам шум тофт задаму гузаштам”,-гуфтааст гумонбар.
Гуфта мешавад, ки ҳоло вазъи саломатии духтарбача хуб аст. То ҳол назари волидайни ин духтар нисбат ба ин ҳодиса маълум нест.
Ба иттилои мақомот Ҷамшед Бобомуллоев қаблан дар соли 2009 барои содир кардани ҷиноятҳои ахлоқӣ бо моддаҳои 138 ва 139 ва барои таҳдид ба куштор бо моддаи 120-и Кодекси ҷиноятӣ суд шудааст.
Номбурда моҳи октябри соли 2024 баъди адои ҷазо аз муассисаи ислоҳӣ озод шудааст. Мақомот мегӯяд, ки гумонбаршаванда дар ҳабси пешакӣ қарор дорад.
Ёдрас мешавем, ки Вазорати корҳои дохилаи кишвар қаблан иттилоъ дода буд, ки алайҳи Ҷамшед Бобомуллоев бо ду иттиҳом – сӯиқасд ба куштор (моддаи 32, қисми 3) ва одамкушӣ (моддаи 104, қисми 2) парвандаи ҷиноӣ ифтитоҳ кардааст.
Қаблан дар Шуъбаи корҳои дохилии шаҳри Панҷакент ба “Азия-Плюс” хабар дода буданд, ки гумонбаршаванда сокини ҷамоати Шинги Панҷакент буда, ҳангоми ҳодиса дар ҳолати мастӣ қарор доштааст. Дар ин шуъба гуфта буданд, ки духтарча баъди корд хӯрдан ба беморхона интиқол ёфта, рӯзи 18-уми феврал аз бемористон рухсат шудааст.
