Дирӯз, 10-уми апрел, кори Фурудгоҳи байналмиллалии шаҳри Душанбе барои беш аз 6 соат қатъ шудааст. Сабаби ин як ҳавопаймои мусофирбари ширкати эронии "Вориш" (Varash Airlines) будааст, ки ҳангоми фуруд омадан аз хати фурудоӣ берун шуда, нишасти "хатарнок" анҷом додааст.
Ин ҳодиса рӯзи гузашта соати 11:40 ба вақти Душанбе рух додааст.
Аз Оҷонсии ҳавонавардии Тоҷикистон ба "Азия-Плюс" гуфтанд, ҳавопаймои "Boeing 737-500", ки аз Теҳрон ба Душанбе парвоз карда буд, ба далели ногаҳон бад шудани вазъи ҳаво ва бориши шадиди жола натавонист ба таври бехатар ба замин фуруд ояд.
Ба гуфтаи ин ниҳод, ҳавопаймо аз хати фурудоӣ берун шуда, дар ҷои нодуруст нишаст анҷом дод ва мавқеаш монеаи фуруд ва парвози дигар ҳавопаймоҳо гардид. Дар пайи ин фаъолияти Фурудгоҳи Душанбе муваққатан қатъ шудааст.
Ба гуфтаи Оҷонсии ҳавонавардии кишвар, ҳамаи ҳавопаймоҳое, ки бояд дар ин фурудгоҳ нишаст анҷом медоданд, ба фурудгоҳи Хуҷанд дар шимоли кишвар ҳидоят шудаанд.
Манбаъ мегӯяд, соати 19:00 ба вақти маҳаллӣ ҳавопаймо ба истгоҳи худ кашонда шуд ва пас аз он фаъолияти Фурудгоҳи Душанбе пурра барқарор гардид.
Тавре ба "Азия-Плюс" аз Оҷонсии ҳавонавардии кишвар хабар доданд, дар натиҷаи ин ҳодиса касе осеб надидааст.
Гуфта мешавад, дар ҳоли ҳозир фурудгоҳ ба реҷаи муқаррарӣ баргашта ва фаъолият дорад.
