Ҳукумати кишвар барои идомаи сохтмони чанд иншооти ҳукуматӣ, мисли бинои Театри миллӣ, сафорати Тоҷикистон дар Ӯзбекистон, бинои чанд вазоратхона аз ҳисоби як фонди давлатӣ ва маблағҳои барзиёди буҷети давлатӣ 201 млн сомонӣ равона мекунад.
Дар ин бора қарорҳои ҳукумати кишвар тасдиқ гардида, дар пойгоҳи иттилоотӣ ва ҳуқуқии Вазорати молияи кишвар нашр шудааст.
Тибқи он, “Дирексияи сохтмони иншооти ҳукуматӣ”-и дастгоҳи иҷроияи президент аз ҳисоби иҷрои барзиёдии нақшаи даромади буҷети ҷумҳуриявӣ дар соли 2025-ум 93 миллион сомонӣ мегирад, ки барои сохтмони чунин иншоот бояд равона шавад:
– 30 миллион сомонӣ барои сохтмони Донишгоҳи давлатии тиббии Хатлон дар ноҳияи Данғара;
– 17 миллион сомонӣ барои сохтмони бинои Сафорати Тоҷикистон дар Ӯзбекистон;
– 15 миллион сомонӣ барои сохтмони меҳмонхона дар маркази ноҳияи Данғара;
– 15 миллион сомонӣ барои сохтмони бинои маъмурии Вазорати маориф ва илми Тоҷикистон;
ИЗОБРАЖЕНИЕ Бинои нави Вазорати маориф ва илм
– 14 миллион сомонӣ барои сохтмони бинои нави Вазорати адлияи Тоҷикистон дар шаҳри Душанбе;
– 2 миллион сомонӣ барои сохтмони бинои маъмурии Вазорати фарҳанги Тоҷикистон.
Ҳамчунин, дирексияи сохтмони иншооти ҳукуматӣ аз ҳисоби маблағҳои Фонди муътадилгардонии рушди иқтисод иловатан 108 млн сомонӣ мегирад, ки барои идомаи сохтмони чунин иншоот бояд равона шавад:
– 45 миллион сомонӣ барои азнавсозии маҷмӯи биноҳои Ҳукумати Ҷумҳурии Тоҷикистон, аз ҷумла толори маҷлисгоҳи универсалӣ;
– 30 миллион сомонӣ барои сохтмони Театри миллии Тоҷикистон дар шаҳри Душанбе;
– 20 миллион сомонӣ – сохтмони Театри миллӣ дар ноҳияи Данғара;
– 13 миллион сомонӣ – сохтмони бинои маъмурии Вазорати фарҳанги Тоҷикистон.
ИЗОБРАЖЕНИЕ Бинои нави Вазорати фарҳанг
Маблағҳо ба Фонди муътадилгардонии рушди иқтисод аз ҳисоби барзиёд иҷро шудани қисми даромади буҷетҳои ҷумҳуриявӣ ва маҳаллӣ таркиб меёбад. Дар буҷети давлатӣ барои соли 2025 пешбинӣ шудааст, ки 25% аз чунин маблағҳо ба фонд равона карда шавад.
Бояд гуфт, ки ин маблағҳо барои сохтмони иншооти ҳукуматӣ иловатан ҷудо мешаванд. Ҳамасола дар буҷети давлатӣ барои сохтмони иншооти ҳукуматӣ ҳазорҳо сомонӣ пешбинӣ мешавад.
Бояд гуфт, барои соли 2025 ҳаҷми даромади буҷети давлатӣ 49,6 миллиард сомонӣ (беш аз $4,5 млрд) пешбинӣ гардидааст. Ин маблағ дар қиёс ба буҷаи соли гузашта 6,6 млрд сомонӣ ё 15,4% зиёд мебошад.
Ёдрас мешавем, ки соли гузашта нақшаи қисми умумии даромади буҷети давлатӣ иҷро гардида, воридоти маблағҳо ба буҷет 46,9 млрд. сомониро ташкил дод, ки нисбат ба нақшаи пешбинишуда 1,8 млрд. сомонӣ зиёд мебошад.
