Имрӯз, 30-юми апрел дар Сафорати Эрон дар Душанбе дар робита ба таркиш дар бандари “Шаҳид Раҷоӣ”-и шаҳри Бандар Аббоси Эрон, ки боиси куштаву захмӣ шудани даҳҳо шаҳрванди ин кишвар шуд, дафтари ёдбуд боз гардид.
Дар маросими мазкур вазири корҳои хориҷии Тоҷикистон Сироҷидин Муҳриддин омада, дар дафтари ёддошт аз номи кишвар арзи таслият баён кард.
Ӯ дар паёмаш ба ҳукумат ва мардуми Эрон, ба вижа ба хонавода ва наздикони фавтидагон ҳамдардӣ изҳор дошта, ба онҳо сабри ҷамил ва ба захмиёни ин таркиш шифои оҷилу комил орзу намуд.
ИЗОБРАЖЕНИЕ Сироҷиддин Муҳриддин
Дар ин баробар, намояндагони илму адабу фарҳанги тоҷик барои изҳори ҳамдардӣ ба Сафорати Эрон дар Душанбе омаданд. Аз ҷумла, раиси Анҷумани дӯстии Тоҷикистону Эрон Кароматулло Олимов, раиси Иттифоқи синамогарони Тоҷикистон Сафар Ҳақдод, Ҳунарпешаи шоистаи Тоҷикистон Абдулмумин Шарифӣ, намояндагони Академияи миллии илмҳои Тоҷикистон, рӯзноманигорон ва дигар чеҳраҳои шинохта дар дафтари ёдбуд изҳори ҳамдардӣ навиштанд.
Сафирони кишварҳои гуногуне чун Афғонистон, Арабистони Саудӣ, Қатар, Беларус, Ҳиндустон, Ҷопон, Туркия, Озарбойҷон, Қазоқистон, Русия, Фаластин ҳам дар ба мардуми Эрон ва пайвандони ҷонбохтагон арзи таслият баён карданд.
Бояд гуфт, ки ин маросим то 16:00 давом мекунад.
Қаблан, Эмомалӣ Раҳмон, президенти Тоҷикистон дар робита ба ин инфиҷори шадид ба раиси ҷумҳури Эрон Масъуд Пизишкиён барқияи изҳори тасаллӣ ирсол намуда буд.
Ёдовар мешавем, ки дар инфиҷор дар шаҳри Бандар Аббос, ки рӯзи 26-уми апрел рух дод, тибқи маълумот охирин, 70 кас ҷон бохта беш аз 1200 нафар осеб бардоштаанд. Хисороти молии ин ҳодиса то ҳол эълон нашудааст. Бархе ҷузъиёти ин ҳодисаро дар ин хабари “Азия-Плюс” мутолиа кунед.
