Сардори “Шабакаҳои тақсимоти барқ”-и шаҳри Истаравшан ҳамроҳ бо собиқ роҳбари филиали ширкат дар ин шаҳр боздошт шудаанд. Онҳо ба дуздии 740 ҳазор сомонии пули трансформатор гумонбар дониста мешаванд.
Дар ин бора Вазорати корҳои дохилӣ хабар дода, гуфтааст, ки гумонбаршудаҳо моҳи майи соли 2022 аз 1 миллиону 490 ҳазор сомонӣ пуле, ки барои харидории трансформатор ҷудо шуда буд, нисфашро дуздидаанд.
“Гумонбаршавандагон, тахминан моҳи майи соли 2022, тибқи маслиҳати пешакӣ, тавассути протоколи тендерӣ барои харидорӣ намудани 1-адад трансформатор ба маблағи умумии 1 миллиону 490 ҳазор сомонӣ бо воситаи таъминотчии ҶДММ "Фарзина", дастгиршуда, марди 33-солаи сокини шаҳри Хуҷанд, ки қаблан соли 2021 бо қисми 2 моддаи 245 ва бо қисми 2 моддаи 340 Кодекси ҷиноятии Ҷумҳурии Тоҷикистон суд шудааст, ҳуҷҷатгузорӣ карда, онро аз шаҳри Душанбе ба маблағи 740 ҳазор сомонӣ харидорӣ карда, боқимонда 740 ҳазор сомониашро байни ҳамдигар тақсим намуда, ба манфиати шахсиашон сарф намуда, ба буҷаи давлат зарари махсусан калон расонидаанд.”, – гуфтааст ВКД.
Ба иттилои манбаъ, сардори “Шабакаҳои тақсимоти барқ”-и шаҳри Истаравшан марди 39-солаи сокини ноҳияи ба номи Бобоҷон Ғафуров буда, аз 16-уми январ соли 2025 то ин ҷониб дар ин вазифа кор мекард.
Шарики ӯ, собиқ сардори филиали “Шабакаҳои тақсимоти барқ”-и шаҳри Истаравшан марди 51-сола аз шаҳри Хуҷанд будааст, ки моҳи марти соли 2023 аз вазифааш барканор шудааст.
Мақомот ному насаби онҳоро зикр накардааст. Кӯшишҳои мо низ барои дарёфти ному насабаш бенатиҷа анҷом ёфт.
ИЗОБРАЖЕНИЕ Акси марбута
Дар ин қазия як нафари дигар низ шарик будааст. ВКД аз ин мард ҳам ном набурдааст ва танҳо ишора кардааст, ки ӯ таъминотгари ҶДММ “Фарзина”, буда, марди 33-солаи сокини шаҳри Хуҷанд мебошад.
Ба гуфтаи ин ниҳод, ин мард соли 2021 барои азонихудкунӣ ё исрофкорӣ (қисми 2-и моддаи 245) ва сохтакории ҳуҷатҳо (қисми 2-и моддаи 340-и Кодекси ҷиноятӣ) суд шудааст.
Дар ҳоле ки назари гумонбаршудаҳо ба ин қазия дастар нест, мақомот гуфтаанд, алайҳи сардори ширкат ва роҳбари филиали он дар шаҳри Истаравшан барои азонихудкунӣ ё исрофкорӣ (қисми 4-и моддаи 245), сӯиистифодаи ваколат аз ҷониби кормандони ташкилотҳои тиҷоратӣ ва дигар ташкилотҳо (қисми 2-и моддаи 295) ва сохтакории ҳуҷҷатҳо (қисми 2-и моддаи 340 Кодекси ҷиноятӣ) парванда боз кардаанд.
Ҳамчунин, нисбати таъмингари ширкати “Фарзина” ҳам бо қисми 4-и моддаи 245 (азонихудкунӣ ё исрофкорӣ), қисми 2-и моддаи 295 (сӯиистифодаи ваколат аз ҷониби кормандони ташкилотҳои тиҷоратӣ ва дигар ташкилотҳо) ва қисми 2-и моддаи 260 (ташкили ғайриқонунии шахси ҳуқуқӣ)-и Кодекси ҷиноятии Тоҷикистон парванда боз кардаанд.
Бояд гуфт, дар як соли охир ин аллакай ҳодисаи дуюми аз ҷониби кормандони шабакаҳои тақсимоти барқи Истаравшан содир гардидани ҷинояти азхудкунӣ ё исрофкории маблағҳои давлатӣ мебошад.
Қаблан кормандони Оҷонсии зиддифасод дуздии амволро ба маблағи зиёда аз 1,2 млн сомонӣ аз корхонаи шабакаҳои барқи шаҳри Истаравшан ошкор карда буданд.
Боздошти масъулини соҳаи барқ дар ҳолест, ки пас аз интиқоди шадиди раисҷумҳур Эмомалӣ Раҳмон ва тағйирот ба қонунгузории кишвар дар мавриди истифодаи ғайриқонунии барқ, назорат дар ин самт пурзӯр шудааст.
Бар пояи тарҳи қонуне, ки онҳо рӯзи 2-апрел баррасӣ ва қабул кардаанд, касоне, ки қоидаҳои истифодаи нерӯи барқро вайрон мекунанд, аз 27 ҳазор то 90 ҳазор сомонӣ ҷарима ва ё аз 3 то 10 сол ба зиндон маҳкум мегарданд.
