Дар Тоҷикистон аз 6-ум то 9-уми июн тӯфони гарду ғубори навбатӣ пешгӯӣ мешавад. Дар робита ба ин, Кумитаи ҳолатҳои фавқулода (КҲФ) аҳолиро аз оқибатҳои он ҳушдор додааст.
Ин ниҳод гуфтаст, ки дар ин рӯзҳо дар вилоятҳои Хатлону Суғд, шаҳру ноҳияҳои тобеи ҷумҳурӣ ва шаҳри Душанбе бо сабаби гарду ғуборе, ки ба кишвар ворид мегардад, баланд шудани ҳолати олудагии ҳаво аз зарачаҳои андозаашон 10мкр (Рм-10) ва 2,5мкр (Рм-2,5) вуҷуд дорад.
Дар пайи ин, КҲФ аз аҳолии кишвар хостааст, ба касоне, ки аз бемориҳои дилу раг ранҷ мекашанд ва ё гирифтори касалиҳои қанд мебошанд, диққат диҳанд.
Ин ниҳод, ҳамчунин, аз ронандагон ва гардишгарӣ талаб кардааст, ки дар ин гуна рӯзҳои пурғубор суръати ҳаракати мошинро дар роҳҳо риоя карда, фосила байни мошинҳоро нигоҳ доранд.
Инчунин, ин ниҳод нӯшидани оби зиёду афшурдаи меваҳо, пушидани тирезаҳо ва тоза нигоҳ доштани ҳавои дохили хона, бо латтаи нарму нам пок кардани фарш ва тирезаҳо ва истифода накардан аз айнакҳои иртиботиро тавсия додааст.
“Ба онҳое, ки гирифтори бемориҳои зиқ ва роҳи нафасанд, тавсия дода мешавад, ки меъёри доруҳои истеъмолиро дар ин рӯзҳо коҳиш надиҳанд ва ҳамеша бо худ дастгоҳҳои нафасдиҳӣ дошта бошанд”, – омадааст дар хабари КҲФ.
Кумитаи ҳолатҳои фавқулода гуфтааст, ки дар ҳоли пеш омадани ҳолати нохуш шаҳрвандон метавонанд бо рақамҳои 112 ва ё 223-13-11, 93 880 28 19 ба ин ниҳод муроҷиат кунанд.
Чанд соли охир чангу ғубор ё хокбориш дар Тоҷикистон зиёд ба чашм мерасад. Махсусан, имсол аллакай, бори чаҳорум аст, ки кишварро чангу ғубор фаро мегирад. Қаблан, КҲФ аз гармои шадид ва тӯфони чангу ғубор хабар дода таъкид карда буд, ки ин гуна болоравии дамо ғайримуқаррарӣ аст ва пеш иттифоқ наафтода буд.
Дар маводи “Азия-Плюс” бо номи “Тоҷикистонро чангу ғубор фаро мегирад. Он чӣ хатар дорад ва барои пешгирӣ чӣ бояд кард?” метавонед дар таъсири чангу ғубор ба солимии инсон маълумот дарёфт кунед.
