Вакилони Думаи давлатии Русия пешниҳод намудаанд, ки муҳоҷирон ба пешниҳоди маълумотномаи тиббӣ (справка) дар бораи мавҷуд набудани сироятҳои вирусӣ зимни вуруд ба Русия уҳдадор шаванд. Дар ин бора вакили Дума Ярослав Нилов дар шабакаи Telegram-и худ хабар додааст.
“Хориҷиёне, ки барои дарёфти даромад ба Русия меоянд, бояд мушкилоти моро ҳал кунанд, на он ки мушкилоти худро биёранд. Масалан, дар як қатор кишварҳо шахсро бе доштани полиси суғуртаи тиббӣ ба кишвар роҳ намедиҳанд. Пас чаро дар ҳолати оммавӣ омадани муҳоҷирон ба Русия мо ин талаботро нодида мегирем?”, — навиштааст ӯ.
Ба гуфтаи Нилов, лоиҳаи қонуне таҳия шудааст, ки бар асоси он, шаҳрвандони хориҷӣ ҳангоми гузаштан аз сарҳад ба пешниҳоди полиси амалкунандаи суғуртаи тиббӣ ва маълумотномаҳо дар бораи набудани ВНМО, гепатитҳои B ва C, оташак (сифилис) ва сил уҳдадор мешаванд.
Илова бар ин, ҳуҷҷате талаб мешавад, ки далели аз ҷониби шахс истеъмол накардани маводи мухаддир ва моддаҳои психотропиро тасдиқ кунад. Вакил таъкид доштааст, ки бе ин ҳуҷҷатҳо вуруд ба Русия ғайриимкон хоҳад буд.
Мувофиқи қонунгузории амалкунанда, шаҳрвандони хориҷие, ки ба муҳлати зиёда аз 90 рӯз ба Русия меоянд, бояд аз муоинаи тиббӣ гузаранд. Айни замон ин муоина одатан баъд аз ворид шудан ба Русия анҷом дода мешавад.
Дар ташаббуси Нилов гузаронидани назорат ё худ муоинаи тиббӣ ба марҳилаи то гузаштан аз марз, яъне дар кишвари худ пешниҳод шудааст.
