Имсол дар ҷангалҳои 9 шаҳру навоҳии кишвар сӯхтор сар зада, беш аз 434 гектарро фаро гирифтааст. Дар ин бора, дар нишасти матбуотии Оҷонсии хоҷагии ҷангал иттилоъ дода, сабаби сӯхторро ба “баландшавии ҳарорати ҳаво ва бемасъулиятии бархе аз истироҳаткунандагон” рабт доданд.
Бахтиёр Облоёрзода, сардори Раёсати хоҷагии ҷангали Оҷонсӣ гуфт, имсол теъдоди сӯхторҳо бештар ба қайд гирифта шуда, 145,8 гектар заминҳое, ки сӯхтор сар задааст, берун аз заминҳои ташкилотҳои системаи Оҷонсӣ будааст.
“Новобаста аз ин, тамоми ҳудудҳо зери назорат гирифта шуда, ҳоло зарари расида аз ҷониби мутахассисони Оҷонсӣ ҳисоб карда мешавад”, – изҳор дошт ӯ.
Ба таъкиди ӯ, тамоми сӯхторҳо моҳи июл рух дода, бештар аз як-ду рӯз давом накардаанд.
Дар ҳамин ҳол корбарони шабакаҳои иҷтимоӣ бо ирсоли аксу навор аз ҷойи сӯхтор аз баъзе минатақаҳо иддао доштанд, ки сӯхтор бештар аз чор рӯз инҷониб идома дорад.
Дар тасвирбаёни зер бо кай, дар кадом ноҳия рух додани сӯхторҳо ва чӣ қадар ҳудудро фаро гирифтани онҳо шинос шавед:
Шарифзода Давлаталӣ, муовини директори Оҷонсии хоҷагии ҷангал тағйирёбии иқлимро яке аз омилҳои асосии зиёд шудани сӯхтор дар кишвар унвон дод.
Ба гуфтаи ӯ, “баландшавии ҳарорати ҳаво ва бемасъулиятии бархе аз истироҳаткунандагон” аз сабабҳои дигари рух додани сӯхторҳо дар кишвар аст.
Ба қавли Шарифзода, ҳоло дар дастрасӣ ба он минтақаҳо мушкил вуҷуд дорад.
“Роҳ нест, рафтан имкон надорад, техника бурда намешавад, пойгоҳи моддию техникӣ суст” – таъкид намуд ӯ.
Ӯ иддао кард, ки сарфи назар аз ин мушкилот, сӯхтор дар кишвар зуд бартараф карда мешавад. Ӯ талоши аҳолиро барои бартараф кардани сӯхторҳо махсус таъкид карда, ин рафтори онҳоро “гувоҳи ҳисси баландӣ шаҳрвандии онҳо” номид.
Давлаталӣ Шарифзода, муовини директори Оҷонсии хоҷагии ҷангал вобаста ба сар садани сӯхторҳо дар кишвар илова намуд, ки ҳамасола аз ҷониби агенти “мавсими хавфи сӯхтор” эълон карда мешавад, ки он аз 15-уми апрел то 15-уми ноябр давом мекунад. Ба таъкиди ӯ, аксаран сар задани сӯхтор дар ҷанлагҳо дар ин марҳила ба қайд гирифта мешавад.
Ӯ ҳамчунин таъкид кард, ки аз ҷониби Оҷонсӣ дар асоси Кодекси ҷангал “Қоидаҳои бехтарӣ аз сӯхтор” таҳия шуда, риояи ҳатмии он аз ҷониби тамоми ниҳодҳое, ки дар ҳудуди ҷангал ҳастанд, талаб карда мешавад.
Бояд гуфт, корбарони “Азия-Плюс” дар шабакаҳои иҷтимоӣ аз сар задани сӯхторҳо нигаронӣ ва аз минтақаҳое, ки сӯхтор ба амал омадааст, аксу навор ирсол карда буданд. Дар ин бора бештар дар маводи “Азия-Плюс” вобаста ба сӯхтори охирин дар вилояти Суғд мутолиа намоед.
