Шаҳрдории Душанбе аз ширкати "Акиа Авесто” 30 автобуси барқӣ ё электробуси нав харидааст. Дар ин бора “Душанбенақлиётхадамотрасон” хабар медиҳад.
Ба гуфтаи ин ниҳод, шартномаи хариди ин нақлиёт миёни шаҳрдории Душанбе ва ширкати "Акиа Авесто автоматив индастрӣ" рӯзи 13-уми август имзо шудааст.
Манбаъ гуфтааст, ки автобусҳои барқӣ дорои 32 ҷойи нишаст буда, дар умум имкони гунҷоиши 100 мусофирро доранд.
“Ҳаҷми умумии батареяҳои электробус 350 кВт-соатро ташкил дода, иқтидори ҳаракати автономиаш то 300 км роҳро дар бар мегирад”, – гуфта мешавад дар хабари расмӣ.
Манбаъ менависад, ки электробусҳо бо таҷҳизоти гармидиҳӣ ва хунуккунанда, 6 камераи назоратӣ ва 2 экрани намоишдиҳанда муҷаҳҳаз мебошанд.
Маълум нест, ки ин автобусҳо кай ва дар кадом хатсайрҳо истифода хоҳанд шуд.
Бояд гуфт, ки ба ҳолати 1-уми сентябри соли 2024 дар роҳҳои пойтахт 375 автобус ва 75 троллейбус фаъолият мекард. Ҳамчунин, беш аз 1000 микроавтобус ва ҳудуди 12 ҳазор такси ба аҳолӣ хидмат мерасонанд. Омори нав ҳоло дастрас нест.
Бо ин вуҷуд, сокинони Душанбе аз норасоии нақлиёти ҷамъиятӣ дар баъзе хатсайрҳо нигаронӣ мекунанд. Бо оғози соли нави хониш ва фасли сармо вазъ метавонад боз ҳам мушкилтар шавад.
Гуфта мешавад, ки шаҳрдории Душанбе нақша дорад то соли 2028 пурра ба нақлиёти мусофиркаши барқӣ гузарад.
