Минбаъд онҳое, ки ба назди фолбину ҷодугару сеҳрдон рафта аз хидмати онҳо истифода мекунанд ба ҷавобгарии маъмурӣ кашида мешаванд ва аз 3750 то 4500 сомонӣ ҷарима мегарданд.
Раёсати Вазорати корҳои дохилӣ дар шаҳри Душанбе дирӯз дар саҳифаи худ дар Телеграм навишт, ки тағйироти зарурӣ оид ба манъи истифода аз хадамоти фолбину ҷодугару сеҳрдонҳо ба Кодекси ҳуқуқвайронкунии маъмурии Ҷумҳурии Тоҷикистон ворид гардида, аз 31-уми июли соли 2025 мавриди амал қарор гирифтааст.
Пешниҳоди муҷозот барои истифода аз хадамоти ҷодугару фолбину сеҳрдон аз сӯйи ҳукумати кишвар ба парлумон ироа шуда буд.
Раёсати ВКД дар Душанбе хабар дод, ки ба моддаи 482 Кодекси ҳуқуқвайронкунии маъмурӣ иловаи 1 (истифодабарӣ аз хизматрасонии сеҳрдон, ҷодугар ва фолбин) ворид гардид.
“Тибқи талаботи моддаи мазкур, нисбати шаҳрвандоне, ки ба назди фолбинон рафта, аз чунин хизматрасониҳо истифода мебаранд, ҷаримаи маъмурӣ ба андозаи аз 50 (3750 сомонӣ) то 60 (4500 сомонӣ) нишондиҳанда барои ҳисобҳо пешбинӣ шудааст”, – зикр мегардад дар хабар.
Бояд гуфт, як сол охир мақомоти Тоҷикистон мубориза бо фолбину ҷодугарро пурзур кардаанд. Тобистони соли гузашта Вазорати корҳои дохилии Тоҷикистон эълон карда буд, ки нафаронеро, ки ба назди фолбину ҷодугар мераванд, ба мақомот даъват карда, ному аксҳояшонро дар махзани ВКД мегузорад.
Мақомот гуфта буданд, “мақсад аз ин кор пешгирӣ аз бовар ба фолбину ҷодугар аст, чун баъзе аз шаҳрвандон ба назди фолбину ҷодугарон рафта ба онҳо пул медиҳанд ва бо ин кор дар густариши фолбиниву ҷодугарӣ саҳм мегузоранд”.
Аммо аз он замон то ҳол теъдоди нафароне, ки ба назди фолбину ҷодугар рафтаанд ва ба мақомот даъват шудаанд, маълум нест.
Дар ҳамин ҳол, соли гузашта ҷазо барои машғул шудан ба фолбиниву ҷодугарӣ пурзур шуд. Парлумони кишвар ба банди 2-юми моддаи 482-и Кодекси ҳуқуқвайронкунии маъмурӣ тағйирот ворид карда, андозаи ҷаримаи маъмуриро то 80-100 нишондиҳанда зиёд кард ва дар баробари ин, ҳабси маъмурӣ ба мӯҳлати аз 10 то 15 шабонарӯз илова гардид.
Қаблан ин моддаи Кодекси ҳуқуқвайронкунии маъмурӣ ҷарима аз 60 то 100 нишондиҳандаро пешбинӣ мекард.
Ҳамчунин, бар асоси тағйироте, ки ба моддаи 240 Кодекси ҷиноятии Тоҷикистон ворид гардид, барои машғул шудан ба сеҳру ҷоду ва фолбинӣ (агар чунин кирдор давоми сол баъди татбиқи ҷазои маъмурӣ содир шуда бошад) аз ҳазору 500 то 2 ҳазор нишондиҳанда барои ҳисобҳо ё аз як то ду соли зиндон пешбинӣ мекунад.
Қаблан барои ин кирдор танҳо ҷазои маъмурӣ пешбинӣ шуда буд.
Ба иттилои ВКД, дар 6 моҳи соли ҷорӣ 495 ҳолати машғул шудан ба сеҳру ҷоду ва фолбинӣ ошкор шудааст.
