Мақомот мегӯянд, ки то имрӯз 70 дарсади корҳои бозсозии хонаҳои сокинони Рашт ва Тоҷикобод, ки дар заминларза қисман осеб дида буданд, иҷро шудаанд. Дирӯз ба оилаҳое, ки хонаҳояшон пурра вайрон шуда буд, манзили нави зист супорида шуд. Хонаҳои қисман зарардида низ бояд то 1-уми ноябр ба истифода дода шавад.
Дар ин бора аз Кумитаи ҳолатҳои фавқулода ва мудофиаи гражданӣ (КҲФ) ба “Азия-Плюс” иттилоъ дода гуфтанд, фаъолияти комиссияи вижа “ҷиҳати барқарорсозии хисороти расида аз офатҳои табиӣ дар минтақаи Рашт идома дорад”.
“Дар ҷамоатҳои деҳоти Ҳичборак, Аскалон ва Қалъаи Сурхи ноҳия Рашт 230 корманди идораву муассисаҳои давлатӣ барои сохтани хонаҳои истиқоматии қисман зарардида, сафарбар гардиданд. Корҳои сохтмонӣ дар 34 адад хонаҳои пурра зарардида пурра ба анҷом расида, дар хонаҳои қисман осебдида идома доранд”, – гуфтанд аз КҲФ.
ИЗОБРАЖЕНИЕ
Аз КҲФ гуфтанд, ки то ҳол дар хонаҳои қисман зарардидаи ноҳияи Рашт корҳои сохтмонӣ дар чунин марҳила қарор дорад:
-дар 116 хона — корҳои ҷобаҷокунӣ ва ҳамворкунӣ (100%);
-дар 116 хона — кандани хандақ (100%);
-дар 116 хона — рехтани таҳкурсӣ (100%);
-дар 116 хона — сохтани таҳкурсӣ (100%);
-дар 116 хона — насби қолаб (100%);
-дар 116 хона — бардоштани девор (100%);
-дар 116 хона — сохтани сутун ва тасмаи оҳану бетонӣ (100%);
-дар 116 хона —пӯшонидани бом (аз 50% то 100%);
-дар 95 хона — андова (аз 50% то 100%);
-дар 81 хона — насби дару тиреза (аз 50% то 100%);
-дар 64 хона — сохтани фаршу шифт (аз 40% то 100%);
-дар 55 хона — корҳои рангу бор (аз 50 % то100 %).
ИЗОБРАЖЕНИЕ
Ҳамчунин, дар хонаҳои қисман зарардидаи ноҳияи Тоҷикобод чунин корҳои сохтмонӣ то ҳол ба анҷом расидааст:
– дар 164 хона — корҳои ҳамворкунии замин (100%);
– дар 164 хона — кандани хандақ (100%);
– дар 164 хона — сохтани таҳкурсӣ то сатҳи замин (100%);
-дар 164 хона — сохтани таҳкурсӣ то девор (100%);
-дар 164 хона — насби қолаб барои рехтани семент (100%);
– дар 163 хона — бардоштани девор (100%)
– 1 хона — бардоштани девор шуруъ нашудааст;
– дар 161 хона — сохтани бом ва болопӯш (аз 10% то 100%);
– дар 146 хона —андова (аз 10% то 100%);
– дар 105 хона — насби дару тиреза (аз 50% то 100%);
– дар 93 хона — сохтани фаршу шифт (аз 10% то 100%);
– дар 51 хона — корҳои рангу бор (аз 10 то 100%);
– дар 9 хона — сохтмони хонаҳо пурра ба анҷом расидааст.
Аз КҲФ санаи дақиқи ба итмом расидани корҳои сохтмони хонаҳои қисман зарардидаро нагуфтанд.
Бояд гуфт, ки тибқи супориши Эмомалӣ Раҳмон ба зарардидаҳо замин ҷудо карда шуда, хонаҳои онҳо бояд то 1-уми ноябри имсол пурра сохта, ба истифода дода шавад.
Дирӯз, 26-уми август раисҷумҳури кишвар ба оилаҳое, ки хонаҳояшон пурра зарар дида буданд калиди манзили зисти навашонро супорид.
Ёдрас мешавем, ки дар пайи заминларзаи рӯзи 13-уми апрел дар ноҳияҳои Рашту Тоҷикобод 1 нафар ҷон бохта, 16 каси дигар ҷароҳат бардоштаанд.
Ҳамчунин, 67 манзили истиқоматӣ пурра ва 280 хона қисман вайрон шуда, 321 хонаи дигар зарари сабук дидаанд. Ҳамчунин, 146 бинои ёрирасон, аз қабили мактаб, бунгоҳи тиббӣ, хатҳои интиқоли барқ, роҳҳо ва системаҳои обтаъминкунӣ зарар дида, 57 сар чорво талаф ёфтааст.
Тибқи иттилои КҲФ зарари заминларза дар маҷмӯъ, беш аз 17,78 миллион сомонӣ ($1,66 млн) ҳисоб шудааст. Дар маҷмуъ 1 ҳазору 331 оила, ҳамагӣ 5 ҳазору 639 нафар зарар дидаанд.
