Дар роҳҳои мошингард ва пиёдагарди шаҳри Душанбе рондани “самокат”-у “скутер”-ҳои барқӣ ва дигар воситаҳои сайёри инфиродӣ, ки қайди давлатӣ надоранд то соли 2030 манъ шуд. Дар ин бора қарори вакилони шаҳри Душанбе қабул шудааст.
Пулиси Душанбе гуфт, истифодаи онҳо танҳо дар маконҳои махсус муайяншуда иҷоза аст. Вале маълум нест, ки чунин маконҳо дар пойтахт ҳаст ё не ва агар мавҷуд аст, дар кадом гӯшаи шаҳр аст.
Аз ин ниҳод ба “Азия-Плюс” гуфтанд, ин қарор танҳо ба скутерҳои инфиродӣ ва ё скутерҳое дахл дорад, ки наврасону кӯдакон истифода мекунанд ва ё дар нуқтаҳои махсус ба “иҷора” дода мешавад.
Қарори мазкур ба “мотосикл” ва ё “скутер”-ҳое, ки аз қайди давлатӣ гузаштаанд ва рақами давлатӣ доранд, дахл надорад.
Ба гуфтаи манбаъ, ин тасмим бо мақсади танзими фаъолияти бенизоми “самокат”-у “скутер”-ҳои барқӣ, коҳиши садамаҳо бо иштироки онҳо, пешгирии халал ба ҳаракати мошинҳову пиёдагардон, инчунин, ҳифзи ҳуқуқу манфиатҳои истифодабарандагони роҳҳои мошингард” гирифта шудааст.
Ба иттилои РВКД дар шаҳри Душанбе, ин тасмим то фароҳам шудани шароити зарурии инфрасохторӣ дар шаҳр барои рондани чунин воситаҳо идома хоҳад ёфт.
Дар робита ба ин, мақомот аз шаҳрвандон, хусусан волидони ноболиғон, хостаанд, ки аз истифодаи “самокат”-у “скутер”-ҳои барқӣ худдорӣ намоянд.
Ин ниҳод мегӯяд, ки дар пайи 26 садамаи нақлиётӣ бо иштироки "скутер"-у "самокат"-ҳои барқӣ 3 тан ҷон бохта, 24 каси дигар ҷароҳат бардоштаанд.
“…сабабҳои асосии рух додани чунин садамаҳо пеш аз ҳама беэҳтиётӣ, риоя накардани талаботи Қоидаҳои ҳаракати роҳ, ҳаракат бо суръати баланд, баромадан ба самти муқобил ва идора намудани скутер аз ҷониби наврасону ноболиғон ба шумор мераванд”, – гуфтанд аз ин ниҳод.
Кадом “скутер”-ҳо иҷозаи фаъолият доранд ва бо кадом шарт?
Бояд гуфт, ки охири соли 2024 ба хотири пешгирӣ аз садамаҳои нақлиётӣ бо ширкати “скутерҳо” ва баҳисобгирии воситаҳои нақлиёт дар кишвар дар идораи онҳо қоидаҳои нав қабул шуд.
Тибқи он ҳамаи скутерҳое, ки суръати онҳо аз 40 км/соат зиёд аст ва муҳаррикашон ҳаҷман 50 кубометрро ташкил медиҳад, ба қайд гирифта шаванд. Соҳибони чунин нақлиёт бояд барои онҳо рақами давлатӣ бигиранд.
Ронандагони бидуни ҳуҷҷат ва сабти ном барои риоя накардани қоидаҳо мутобиқи моддаи 310-и Кодекси ҳуқуқвайронкунии маъмурӣ аз 74 то 150 сомонӣ ҷарима мешаванд.
Ҳангоми санҷиш, ронандагони скутер бояд ҳуҷҷатҳои зеринро пешниҳод кунанд:
– шаҳодатномаи ронандагӣ;
– шаҳодатномаи сабти ном;
– ҳуҷҷати тасдиқкунандаи ҳуқуқи моликият;
– санади суғуртаи ҳатмии шаҳрвандии нақлиёт.
Бар иловаи рақами давлаӣ, ҳамчунин соҳибони скутерҳо вазифадор шудаанд, ки шаҳодатномаи бақайдгирӣ (техпаспорт) ва ҳуҷҷат барои нобудсозии нақлиёт гиранд. Арзиши шаҳодатномаи бақайдгирӣ (техпаспорт)-и скутерҳо 280 сомонӣ, пули рақами қайди давлатӣ 270-280 сомонӣ муайян шуда, инчунин, барои нобуд сохтан (утилизатсия)-и нақлиёти 360 сомонии дигар мепардозанд.
Дар чанд соли охир фаъолияти колорасонӣ дар Тоҷикистон ба таври назаррас рушд кардаву чандин ширкатҳо фаъол гардиданд ва аксари онҳо бо скутеру мопедҳо хидматрасонӣ мекунанд.
