Ба иттилои хабаргузории ТАСС, раиси Кумитаи давлатии амнияти миллӣ (КДАМ)-и Тоҷикистон Саймумин Ятимов зимни суханронӣ дар Конфронси сеюми ИДМ оид ба муқовимат ба терроризм ва ифротгароӣ дар Душанбе, рӯзи 23-юми октябр изҳор доштааст, ки муҳоҷирони корӣ яке аз гурӯҳҳои бештар осебпазир боқӣ мемонанд, ки созмонҳои байнулмилалии террористӣ онҳоро дар фазои пасошӯравӣ фаъолона ҷалб мекунанд.
Ба гуфтаи ӯ, тайи солҳои ахир сохторҳои ифротгарои марбут ба ҷинояткории фаромиллӣ ва киберӣ бо таъсиси ҳалқаҳои хуфта дар қаламрави кишварҳои минтақа фаъолияташонро тақвият бахшидаанд.
“Имрӯз созмонҳои террористиву ифротгаро ва ҳалқаҳои хуфтаи онҳо, ки бо ҷинояткриҳои фаромиллӣ ва киберӣ алоқаманданд, барои ноором кардани вазъ дар минтақа фаъол гаштаанд. Тайи солҳои ахир созмонҳои байнулмилалии террористӣ дар қаламрави давлатҳои минтақа ҳалқаҳои хуфта таъсис медиҳанд. Ҷалби аъзо бештар аз ҳисоби муҳоҷирони корӣ ҳамчун табақаи бештар осебпазир анҷом дода мешавад, ки дар ин раванд аз хусусиятҳои равонии минтақавӣ барои паҳн кардани идеологияи тундгаро ва сиёсисозии ислом истифода мебаранд”, – гуфтааст Ятимов.
Ӯ ҳамчунин зикр кардааст, ки бо мақсади пешгирии ҷалби шаҳрвандон ба созмонҳои террористиву ифротгаро, мақомоти Тоҷикистон зиёда аз 4 ҳазор нафар донишҷӯёнеро, ки дар муассисаҳои таълимии динӣ дар хориҷа таҳсил мекарданд ва зери таъсири гурӯҳҳои тундгаро қарор доштанд, ба ватан баргардониданд.
“Дар сафи сохторҳои байнулмилалии террористӣ, ки дар Сурия амал мекунанд, зодагони кишварҳои ИДМ низ ҳузур доранд, ки таҷрибаи ҷангии худро такмил медиҳанд”, – илова намудааст раиси КДАМ Тоҷикистон.
Ятимов зикр кардааст, ки барои муқовимат бо чунин таҳдиду чолишҳо ҳукумати Тоҷикистон тадбирҳои “қотеъона ва маҷмӯавӣ” рӯйи даст мегирад.
Конфронс аз ҷониби КДАМ Тоҷикистон дар ҳамдастӣ бо Маркази зиддитеррористии ИДМ созмон дода шуд. Дар кори он зиёда аз 150 нафар намояндагони 11 кишвари узви ИДМ, кишварҳои аъзои СҲШ, инчунин як қатор созмонҳои байнулмилалӣ, аз ҷумла СММ, Сохтори минтақавии зиддитеррористӣ, СҲШ ва котиботи СААД ширкат варзиданд.
Иштирокчиёни конфронс масоили дигаргун гардидани низоми байнулмилалии амният, таъсири омилҳои сиёсиву иқтисоди ва динӣ ба болоравии фаъолмандии террористӣ, инчунин истфиодаи технологияҳои иттилоотӣ ва зеҳни сунъӣ дар пайгирии таҳдидҳоро баррасӣ карданд.
