Ҳунарнамоии варзишгарони тоҷик дар Бозиҳои III Осиё миёнаи наврасон, ки дар Баҳрайн ҷараён дорад, идома дорад. Чанд рӯзи гузаштаи мусобиқа мунтахаби Тоҷикистон ба дарёфти боз 9 медал даст ёфт, ки 2-тоаш тилло ва 7-тоаш биринҷӣ аст.
Дар рақобатҳои рӯзи 25 октябр дар навъи варзиши ММА байни ҳаваскорон Фазлиддин Халилов ва дар вазни 55 кг ва Умарҷони Умед дар вазни 70 кг ба дарёфти медалҳои тилло ноил гардиданд.
ИЗОБРАЖЕНИЕ Дорандаи медали тиллои мусобиқа Умарҷони Умед (лар марказ)
Ба дарёфти медалҳои биринҷии мусобиқа варзишгарони зерин даст ёфтанд: Меҳрона Қаландарбекова (55 кг), Марҳабо Бобоева (60 кг), Умар Шарифов (50 кг), Муҳаммад Саидзода (60 кг), Осими Бегмуродзода (60 кг), Абӯбакр Баҳромов (75 кг) ва Мӯсо Иброҳимзода (80 кг).
Ба ҷуз ММА, таэквондочӣ Абдуҷаъфари Баҳодур дар вазни 55 кг медали биринҷҷи мусобиқаро ба даст овард.
Ёдрас мекунем, ки қаблан Ҷонибек Неъматов дар мусобиқаи таэквондо дар вазни аз 73 кг боло медали нуқра ба даст оварда буд. Медали аввалро барои дастаи мунтахаби Тоҷикистон Абӯбакр Тӯраев дар навъи кураш (биринҷӣ) гирифта буд.
Ба ин тариқ, шумори умумии ҷоизаҳои мунтахаби Тоҷикистон ба 12 адад расид – 2 медали тилло, 1 – нуқра ва 9 – биринҷӣ.
Пас аз рӯзҳои навбатии бобарор мунтахаби Тоҷикистон дар ҳисоби умумии медалҳо то зинаи 14-ум боло рафта, аз дастаҳои Урдун ва Баҳрайн пеш гузашт.
Мавқеи мунтахаби Тоҷикистон дар ҳисоби медалҳои Бозиҳои Осиё
ИЗОБРАЖЕНИЕ Мавқеи Тоҷикистон аз рӯи ҳисоби медалҳои мусобиқа
Дар даҳгонаи аввали пешсафон аз рӯи ҳисоби умумидаставӣ тимҳои зерин қарор доранд: Чин – 69 медал (34 тилло, 24 нуқра, 11 биринҷӣ), Ӯзбекистон – 28 (14-5-9), Тайиланд – 30 (13-12-5), Эрон – 37 (9-9-19), Қазоқистон – 35 (9-8-18), Филиппин – 17 (6-5-6), АМА – 13 (5-4-4) Тайбэйи Чин – 21 (4-6-11), Ҳиндустон – 24 (3-10-11), Арабистони Саудӣ – 12 (3-4-5).
Дар ин Бозиҳои Осиё ҳудуди 4000 варзишгар аз 45 кишвар иштирок доранд. Варзишгарон дар 26 навъи варзиш, ҳам навҳои классикии олимпӣ ва ҳам мусоир, аз қабили муай-тай, текбол, киберспорт ва ҳунарҳои омехтаи размӣ (ММА) рақобат мекунанд.
Ҳайати мунтахаби Тоҷикистон аз 65 нафар варзишгарон иборат аст, ки дар 12 навъи варзиш – аз боксу ҷудо то ҷиу-ҷитсу ва шиноварӣ ҳунарнамоӣ мекунанд.
Барои бисёре аз варзишгарони наврас Бозиҳо дар Баҳрайн як санҷише пеш аз Бозиҳои олимпӣ миёни наврасон-2026 дар Дакар маҳсуб меёбанд.
