Дар Ӯзбекистон “Портали ягонаи ҳаҷ ва умра” роҳандозӣ гардид. Шаҳрвандони ин кишвар метавонанд аз хона худро барои адои ҳаҷ сабтином кунанд.
Кумитаи умури дини Ӯзбекистон хабар медиҳад, ки шаҳрвандон имкон доранд тавассути ду сомонаи давлатии www.my.gov.uz ва haj-www.umra.gov.uz сабти ном шаванд.
Ҳадаф аз таъсиси портал фароҳам овардани осонӣ, таъмини шаффофият, аз байн бурдани навбатпоӣ ва ба шакли электронӣ гузаронидани раванди ҳуҷҷатсупорӣ барои зоирон будааст.
“Ба шаҳрвандон имкон дода шуд, ки дар хона истода, ба таври фосилавӣ сабтином шаванд. Равандҳои гуногуни қоғазбозӣ, аз қабили ҷамъоварии ҳуҷҷатҳо ва муроҷиат ба ширкатҳои мустақил хотима дода шуд”, – омадааст дар гузориши Кумитаи дин.
Аммо маълум нест, ки шаҳрвандони хориҷӣ низ метавонанд аз ин имкон истифода кунанд ё не.
ИЗОБРАЖЕНИЕ
Зеро солҳои охир теъдоде аз шаҳрвандони Тоҷикистон тариқи ширкатҳои сайёҳии Ӯзбекистон ба умра мераванд. Дар аксар ҳолат нархи нисбат ба ширкатҳои ватанӣ поёнтар онҳоро ба интихоби ширкатҳои ӯзбекистонӣ водор кардааст. Аммо ҳолатҳои фиреби шаҳрвандони Тоҷикистон аз сӯйи ширкатҳои Ӯзбекистон низ мушоҳида шудааст.
Дар Тоҷикистон бошад, хоҳишмандони зиёрати хонаи Худо ба шуъбаҳои Кумитаи дин, танзими анъана ва ҷашну маросим дар шаҳру ноҳияҳо мустақиман ва тариқи ҳузурӣ муроҷиат мекунанд.
Онҳое, ки ба умра мераванд, аз хадамоти ширкатҳои хадамотрасон метавонанд истифода кунанд.
Ёдовар мешавем, ки қаблан Вазорати ҳаҷ ва умраи Арабистони Саудӣ эълом карда буд, дар мавсими Ҳаҷ – 2026 танҳо дар сурати доштани шаҳодатномаи тиббӣ аз замимаи “Нусук”, ба зоирон раводиди ҳаҷ дода мешавад. Ин талабот ба хотири таъмини амният ва саломатии зоирон аст.
