Эмомалӣ Раҳмон, раисҷумҳури Тоҷикистон супориш дода буд, ки хонаҳои аз заминларзаи моҳи апрели соли равон осебдидаи Рашту Тоҷикободро то 1-уми ноябр пурра сохта, ба истифода диҳанд. "Азия-Плюс" иҷрои ин супоришро аз масъулин ва худи сокинони зарардида пурсид.
Дар пайи заминҷунбии моҳи апрел дар ноҳияҳои Рашту Тоҷикобод дар умум, 65 хонаи истиқоматӣ пурра ва садҳо хонаи дигар қисман хароб ва осеби сабук дида буданд.
Аз Кумитаи ҳолатҳои фавқулода ва мудофиаи гражданӣ (КҲФ) ба “Азия-Плюс” гуфтанд, ки бунёди хонаҳои зарардида дар ноҳияи Рашт 26-уми октябр ва дар ноҳияи Тоҷикобод 27-уми октябр пурра ба анҷом расидааст.
Аз ин ниҳод гуфтанд, 116 хонаи зарардида дар ҷамоатҳои деҳоти Ҳичборак, Аскалон ва Қалъаи Сурхи ноҳияи Рашт пурра ба итмом расида, ҳамчунин, 164 хона дар ҷамоатҳои Қалъаи Лаби Об ва Лангари Шоҳ дар ноҳияи Тоҷикобод пурра бунёд шуда, ба соҳибонашон супорида шудаанд.
Сокинон чӣ мегӯянд?
Сокинони Тоҷикобод низ дар суҳбат бо “Азия-Плюс” тасдиқ карданд, ки хонаҳое, ки пурра хароб гардида буданд, комилан азнавсозӣ шуда, ба соҳибонашон дода шудаанд. Аммо ба гуфтаи онҳо, нафароне, ки хонаҳояшон қисман хароб гардида буд, танҳо масолеҳи сохтмонӣ гирифтанду хонаҳоро бояд худашон созанд.
“Ба нафароне, ки дар рӯйхати 50-фоизаҳо буданд, танҳо масолеҳи сохтмониро доданд ва ҳар соҳибхона худаш сохта истодааст. Баъзе одамон тамом карданд, баъзеҳо не. Онҳое, ки қувваи корӣ надоранд ё дар муҳоҷират буданд, ҳанӯз сохта истодаанд”, – гуфт яке аз сокинони деҳаи Бӯстони ноҳияи Тоҷикобод.
Дар ҳамин ҳол, аз КҲФ гуфтанд, ҳам хонаҳое, ки пурра ва ҳам қисман зарар дида буданд, аз ҷониби давлат бо масолеҳи сохтмонӣ таъмин ва азнавсозӣ шудаанд.
Баъзе сокинони дигари деҳаи Бӯстони Тоҷикобод мегӯянд, бо вуҷуди хароб шудани хонаҳояшон кӯмаке нагирифтаанд ва манзилашон ба рӯйхати зарардидаҳо ворид накарданд.
Ба гуфтаи яке аз сокинони деҳаи Бӯстони Тоҷикобод, дар натиҷаи заминларза хонааш якпаҳлӯ гашта буд, аммо ҳангоми барӯйхатгирӣ “ягон девораш ба замин наафтодааст” гуфта, хонаи ӯро ба рӯйхати зарардидаҳо ворид накардаанд ва танҳо 2 ҳазору 500 сомонӣ кӯмакпулӣ додаанд.
Ҳамсуҳбати мо мегӯяд, дар ин хона имкони зиндагӣ кардан набуд, бинобар ин “як хонаи чӯбӣ рост кардааст, ки ҳоло оилааш онҷо зиндагӣ дорад ва худаш дар Душанбе дар сохтмон кор мекунад”.
Бояд гуфт, дар пайи заминларзаи рӯзи 13-уми апрел дар ноҳияҳои Рашту Тоҷикобод 1 нафар ҷон бохта, 16 каси дигар ҷароҳат бардоштанд. Ҳамчунин, 67 манзили истиқоматӣ пурра ва 280 хона қисман вайрон шуда, 321 хонаи дигар зарари сабук дида буданд. Ҳамчунин, 146 бинои ёрирасон, аз қабили мактаб, бунгоҳи тиббӣ, хатҳои интиқоли барқ, роҳҳо ва системаҳои обтаъминкунӣ зарар дида, 57 сар чорво талаф ёфта буд.
КҲФ гуфта буд, зарари заминларза дар умум беш аз 17,78 миллион сомонӣ ($1,66 млн) ҳисоб шуда, дар маҷмуъ 1 ҳазору 331 оила зарар дидаанд.
Хабарнигори “Азия-Плюс” низ баъди заминларза ба ин минтақа сафар карда, бо сокинони Рашту Тоҷикобод суҳбат ва аз рафти сохтмон боздид карда буд. Гузориши “Азия-Плюс”-ро аз хонаҳои зарардидаи сокинони ин минтақа дар ин пайванд мутолиа кунед: Баъди зилзила. Сокинони Рашту Тоҷикобод чӣ аҳвол доранд?
