Хадамоти байналмилалии харитавии "2GIS" харитаи Душанберо дар шакли 3D омода ва фаъол кардааст, ки дар он метавон суроғаи биноҳо, номи ширкат, масири лозимаро ҷӯстуҷӯ ва пайдо кард.
Ин харита дар Тоҷикистон танҳо барои шаҳри Душанбе фаъол аст. Маълум нест, ки он кай фаъол гашта ва дигар минтақаҳои кишварро кай фаро мегирад.
Бартарияти "2GIS" дар он аст, ки масири лозима бо ишораи суроғаи дақиқ ва акси биноҳо ишора шуда, ба забони тоҷикӣ низ дастрас аст.
ИЗОБРАЖЕНИЕ намогирифт аз барнома
Бо пахши суроғаи лозима дар барнома соати корӣ, самти фаъолият, акс ва дигар маълумоти дақиқ пешниҳод мешаванд. Ҳамчунин, 3D модели биноҳои калидӣ ва нуқтаҳои сайёҳии Душанбе, мисли пайкараи Исмоили Сомонӣ, бинои парлумонва майдони "Истиқлол" тартиб дода шудааст.
Кӯчаву хиёбонҳое, ки бештар тамбашавӣ мушоҳида мешаванд, дар харита ишора шудааст.
Ин харита ҳам дар шакли барномаи телефонӣ ва ҳам веб-саҳифа дастрас аст. Барнома барои боргирӣ дар платформаҳои "App Store" ва "Play Market" дастрас аст. Боргирӣ ва истифодаи барнома барои корбарон ройгон аст.
Дар саҳифаи расмии он маълумоти дақиқ дар бораи барнома пешниҳод шудааст. Забони тоҷикӣ дар бахши интихоби забонҳо “TG” ишора шудааст.
Дар саҳифаи расмии барнома гуфта мешавад, ки айни ҳол ин харита дар бештар аз 1400 шаҳри ИДМ ва Русия фаъол буда, бештар аз 85 млн истифодабаранда дорад.
Ин барнома аввал дар Русия фаъол гашта, ҳоло дар бештари кишварҳои ИДМ истифода мешавад.
