Дар ҳамлаи ҳавоии нерӯҳои Исроил ба минтақаи ҷануби шаҳри Бейрут, Ҳайсам Алӣ Таботабоӣ, раиси Ситоди гурӯҳи “Ҳизбуллоҳ”-и Лубнон кушта шудааст.
Ба гузориш расонаҳои Лубнон, Таботабоӣ, ки бо номи Саид Абуалӣ маъруф буд, соли 1968 аз падари эронӣ ва модари лубнонӣ дар Бейрут ба дунё омадааст. Ӯ замоне фармондеҳи воҳиди “Ризвон”, нерӯҳои нухбаи “Ҳизбуллоҳ” буд ва пас аз он Таботабоӣ ба унвони нафари дуввуми ин гурӯҳ пас аз Наим Қосим шинохта мешуд.
Ҳамлаи маргбори Исроил ба Бейрут рӯзи 23-юми ноябр анҷом шуда, дар пайи он, ба иттилои Вазорати беҳдошти Лубнон, дасти кам 5 нафар кушта ва ҳудуди 30 тани дигар маҷруҳ шудаанд.
Дафтари нахуствазири Исроил эълон кард, ки Бенямин Нетаняҳу шахсан дастури ҳамлаи ҳавоӣ ба Лубнонро содир кардааст. Исроил Таботабоиро “масъули роҳбари раванди бозсозӣ ва мусаллаҳ кардани" Ҳизбуллоҳ хондааст.
“Ҳизбуллоҳ” гуфтааст, ки Исроил бо ин ҳамла “хатти сурх”-ро убур кардааст. Алӣ Аммор, намояндаи “Ҳизбуллоҳ” дар парлумони Лубнон ҳуҷуми Исроилро “таҷовузи хоинона ба як минтақаи комилан маскунӣ” хондааст.
Жозеф Аун, раисҷумҳури Лубнон, аз ҷомеаи ҷаҳонӣ хостааст, ки барои боздоштани ҳамлаҳои Исроил ба кишвараш қотеона мудохила кунанд.
Куштори фарди дуввуми ин гурӯҳ дар ҳолест, ки дар моҳи сентябри соли гузашта, дар пайи як ҳамлаи Исроил ба Бейрут, Ҳасан Насруллоҳ, роҳбари пешини “Ҳизбуллоҳ” кушта шуда буд.
Пас аз кушта шудани Ҳасан Насруллоҳ, Наим Қосим, ки то ин вақт муовини дабири кулли ин гурӯҳ буд, роҳбарии "Ҳизбулоҳ"-ро ба уҳда гирифт.
Ёдовар мешавем, ки пас аз ҳамлаи Исроил ба Ғазза, "Ҳизбуллоҳ" бо нишони ҳамраъйӣ ба мардуми Фасластин амалан вориди ҷанг бо Исроил шуд. Дар вокуниш ба ин, Исроил ҳамла ба Лубнонро густариш дод ва чанд роҳбари “Ҳизбуллоҳ”-ро кушт.
