Раёстаи ВКД дар шаҳри Душанбе гуфтааст, ин модар фарзанди худро ба савдо ва оворагардӣ водор карда, ӯро аз таҳсилоти ибтидоӣ дур сохтааст.
Мақомот рӯзи 21-уми ноябр, гуфтаанд, ки бо назардошти ин ҳолат, бар асоси моддаи 73-и Кодекси оила, ки гирифтани кӯдакро бе маҳрум кардан аз ҳуқуқи падару модарӣ иҷоза медиҳад, фарзанди ин занро аз ӯ гирифта, ба Мактаби махсуси ҷумҳуриявӣ додаанд.
"Аз ҷумла, дар натиҷаи санҷиш, аз ҷониби кормандони ШВКД-2 дар ноҳияи Шоҳмансур муайян карда шуд, ки шаҳрванд Мирзораҳматова У., писари хурдсоли худро ба савдо дар маконҳои номуайяншуда ва оворагардӣ водор намуда, аз таҳсилоти ибтидоӣ дур сохтааст", – гуфтааст РВКД дар пойтахт.
Назари модари ноболиғ дар робита ба ин қазия маълум нест.
Мақомот аз шаҳрвандон даъват кардааст, ки дар робита ба таълиму тарбияи фарзандон масъулияти ҷиддӣ эҳсос кунанд.
Қаблан, дар моҳи апре ҳам пулиси пойтахт, ду кӯдаки 8 ва 10-соларо, ки модарашон ба талбандагӣ маҷбур мекард, ҷудо карда, ба мактаб-интернати рақами 1-и шаҳри Душанбе супоридаанд.
Ёдрас мешавем, ки қаблан пулиси Душанбе гуфта буд, назоратро болои волидайне, ки масъулияти худро дар тарбияи фарзандон иҷро намекунанд, сахттар мекунад ва дар сурати аз уҳдаи тарбияи кӯдакон набаромадани падару модар онҳоро аз дасташон мегирад ва ба муассисаҳои махсуси таълимӣ месупорад.
Манбаъ гуфта буд, ин тасмим “дар асоси тартиби муқаррарнамудаи қонунгузорӣ” амалӣ карда мешавад.
Он замон мақомот иттилоъ дода буд, як ноболиғи 15-сола, ки дар шаҳри Душанбе борҳо ҷинояти дуздӣ содир карда, шабона ба оворагардиву талбандагӣ дар роҳҳои мошингард машғул мешуд, аз модараш гирифта, дар муассисаи махсуси таълимӣ “Лисейи махсуси касбӣ – техникӣ”-и шаҳри Душанбе супорида шудааст.
