Вазири корҳои хориҷии Тоҷикистон дар нишасти хабарӣ гуфт, ки Консулгарии Афғонистон дар шаҳри Хоруғи ВМКБ фаъолияташро идома медиҳад. Ин дар ҳолест, ки расонаҳои Афғонистон моҳи декабри соли гузашта навишта буданд, ҳукумати Толибон* ин консулгариро бастааст. Он замон ВКХ Тоҷикистон ҳам ин иттилоъро тасдиқ карда буд.
Сироҷиддин Муҳриддин имрӯз, рӯзи 6-уми феврал изҳор дошт, ки “Консулгарии Афғонистон дар шаҳри Хоруғ аз моҳи апрели соли 2003 ифтитоҳ шуда, то ба имрӯз фаъолият дорад”.
“Бо таваҷҷуҳ ба пайвандҳои ногусастании таърихӣ ва ҳамзабонии нек миёни мардуми Тоҷикистон ва Афғонистон кишвари мо дар асоси санадҳои ҳуқуқӣ-байналмилалии пазируфташуда фаъолияти он намояндагииро мувофиқи мақсад медонад”, – изҳор дошт вазири корҳои хориҷи Тоҷикистон.
Расонаҳои Афғонистон моҳи декабри соли гузашта навишта буданд, ки ҳукумати Толибон* дар Афғонистон Нақибуллоҳ Деҳқонзода, консули Афғонистон дар шаҳри Хоруғи Тоҷикистонро аз кор ронда, аз 15-уми декабри соли 2025 фаъолияти Консулгарии Афғонистон дар ин шаҳҳрро қатъ кардааст.
Рӯзномаи “8-и субҳ”-и Афғонистон навишта буд, ки Нақибуллоҳ Деҳқонзода, ки консули ҳукумати пешини Афғонистон дар Хоруғ буд, пас аз тағйири қудрат дар ин кишвар бо Толибон ҳамкорӣ дошт. Ба гуфтаи манбаъ, ӯ 120 ҳазор доллар даромадҳои ҳосилшуда аз хадамоти консулиро ба Вазорати корҳои хориҷии ҳукумати Толибон интиқол додааст.
Он замон аз Вазорати корҳои хориҷии Тоҷикистон хабари баста шудани консулгарии Афғонистон дар Хоруғро ба “Азия-Плюс” тасдиқ карда, гуфта буданд, “ин тасмими худи ҳукумати ҳоким дар Афғонистон аст”.
Расонаҳои Афғонистон гузориш дода буданд, ки барканории Деҳқонзода дар ҳоле сурат гирифтааст, ки Толибон тасмим доштанд ӯро ба ҷои Зоҳир Ағбар, сафири ҳукумати пешини Афғонистон дар Тоҷикистон, ба ҳайси сафири нав муаррифӣ кунанд.
Мақомоти расмии ҳукумати Толибон то ҳол дар робита ба баста шудани консулгарии Хоруғ изҳороти расмӣ нашр накардаанд.
Нақибулло Деҳқонзода моҳи ноябри соли 2023 ва пас аз ду соли ба қудрат расидани ҳукумати Толибон дар Афғонистон эълон карда буд, ки Консулгарии Афғонистон дар шаҳри Хоруғи Тоҷикистон расман фаъолият мекунад ва он мустақил буда, мустақиман таҳти ҳимоят ва ҳидояти Вазорати умури хориҷии ҳукумати Толибон қарор дорад.
Бояд гуфт, Тоҷикистон ягона кишвар дар Осиёи Марказӣ аст, ки ба таври расмӣ мегӯяд, бо Толибон равобити мустақим надорад, аммо гузоришҳо аз мулоқоту машвари дуҷониба, ки вақтҳои охир зиёд нашр мешаванд, гумони нармиш дар сиёсати Тоҷикистон дар қиболи Толибонро зиёд мекунад.
Аз ҷумла, охири соли гузашта расонаҳо о дар бораи сафари Юсуф Вафо, волии вилояти Балх ба Душанбе ва дидораш бо бо Саймумин Ятимов, раиси Кумитаи давлатии амнияти миллии Тоҷикистон ва Саидмукаррам Абдулқодирзода, раиси Шӯрои уламо ва муфтии Тоҷикистон расонаӣ шуда буд.
Пештар аз ин, боз ҳам расонаҳои Афғонистон навишта буданд, ки Саймумин Ятимов ба Кобул сафар карда, бо мақомдорони Толибон вохӯрдааст. Аммо мақомоти Тоҷикистон ҳеҷ як аз ин сафару дидорҳоро тасдиқ ё рад накарданд.
*Дар Тоҷикистон гурӯҳи террористӣ эътироф шудааст.
Ҳар он чи дар Афғонистон рух медиҳад, метавонед мустақиман дар сужаи мо – "Афғонистон" бихонед.
