Эмомалӣ Раҳмон, раисҷумҳури Тоҷикистон супориш додааст, ки сифати таълими алифбои ниёгон дар муассисаҳои соҳаи маориф беҳтар карда шавад. Ӯ имрӯз, 29-уми май, дар ҷаласаи ҳукумати Тоҷикистон гуфтааст, ки ин кор “дар доираи омӯзиш ва тарғибу ташвиқи таъриху фарҳанги ориёӣ” анҷом шавад.
Солҳои пеш дар макотиби Тоҷикистон таълими хати ниёгон ва ё форсӣ аз синфҳои ибтидоӣ оғоз мешуд, аммо ҳоло дар мактабҳои Тоҷикистон омӯзиши хатти форсӣ танҳо барои хонандагони синфҳои 7 ва 8-ум ба роҳ монда шудааст. Онҳо ҳафтае ду соат дарси алифбои ниёгон мехонанд.
Дар умум, тақвияти омӯзиши хати форсӣ дар Тоҷикистон, ки то солҳои 20-уми асри гузашта хати рамии сокинонаш буд, солҳо ин ҷониб аз сӯйи донишмандону таҳлилгарон таъкид мешавад. Дар ин моваро, теъдоде ҳам пешниҳод мекунанд, ки хати сирилики кунунӣ бо хати ниёгон иваз карда шавад. Махсусан дар ҳоле, ки аксари кишварҳои минтақаи Осиёи Марказӣ аз хати сирилик канора мегиранд. Масалан дар Ӯзбекистон қариб бист сол пеш тасмим гирифтанд, ки ба хати лотинӣ баргарданд ва ҳоло қариб пурра ба ин хат баргаштаанд. Дар Қазоқистон ҳам солҳои охир раванди бозгашт ба хати лотинӣ тақвият ёфтааст.
Дар ҳоле, ки хати лотинӣ барои кишварҳои минтақа бегона аст ва аммо онҳо барои канорагирӣ аз хати сирилик ба ин хат бармегарданд, худдорӣ ё кашолкории Тоҷикистон аз бозгашт ба хати гузаштагонаш – форсӣ, ки тамоми осори гаронарзиши классиконаш бо он навишта шудааст, барои аксар рӯшанфикрон муаммо аст.
