Душанбе. 8-уми апрел. ОИ «Азия-Плюс» – Бар асоси фармонҳои чанде қабл баимзорасида аз ҷониби президенти Тоҷикистон Эмомалӣ Раҳмон, сафири Тоҷикистон дар Арабистони Саъудӣ аз ин ба баъд дар як вақт вазифаи сафири кишвар дар Яманро низ иҷро хоҳад кард.

           

Чӣ тавре ки аз департаменти иттилооти Вазорати умури хориҷии ҶТ ба ОИ «Азия-Плюс» хабар доданд, ҳамзамон сафири Тоҷикистон дар Миср Нарзулло Назаров дар як вақт вазифаи сафири ҷумҳурӣ дар Ҷумҳурии Сотсиалистии Халқии Либияи Арабро низ ба ӯҳда мегирад. «Ба дӯши сафири Тоҷикистон дар Белгия дар як вақт иҷрои вазифаи сафири Тоҷикистон дар Люксембург ва Шоҳигарии Нидерланд вогузор шуд», – афзуд манбаъ.

           

Душанбе. 7-уми апрел. ОИ «Азия-Плюс» – Имрӯз дар шаҳри Душанбе ба муносибати таҷлили ҷашни Рӯзи байнулмилалии беҳдошт бо иштироки роҳбари намояндагии Созмони ҷаҳонии беҳдошт дар Тоҷикистон Сантино Северони, муовини аввали вазири тандурустии ҷумҳурӣ Саодат Ҷобирова ва муовинони вазири тандурустӣ Соҳибназар Раҳмонов ва Аъзам Мирзоев ва намояндагони васоити ахбори умуми хогиҷиву ватанӣ нишасти хабарӣ доир гардид.

           

Дар суханрониаш С.Северони изҳор дошт, ки ҳамасола Рӯзи байнулмилаии беҳдошт таҳти шиоре сурат мегирад ва соли равон он ба масъалаи бехатарии муассисаҳои тиббӣ ва омодагии кормандони бахши беҳдошт баҳри кӯмак ба ҷабрдидагон аз офатҳои табиӣ бахшида шудааст.

           

Намояндаи Созмони ҷаҳонии беҳдошт гуфт, соли гузашта дар саросари ҷаҳон 321 вазъи фавқулодда ба вуқӯъ пайваста, бар асари он 250 ҳазор нафар ҷони худро аз даст додаанд. «Агар ба вазъи Тоҷикистон назар андозем, метавон ба хулосае омад, ки он ҳар лаҳза метавонад тағйир бипазирад ва аз ин рӯ, муассисаҳои тиббии кишвар ва ҳайати шахсии он бояд ҳамаҷониба ба рух додани чунин холатҳо омода бошанд», – гуфт ӯ.

           

Душанбе. 7-уми апрел. ОИ «Азия-Плюс» – Вазорати молияи ҷумҳурӣ ният дорад доир ба реструктуризатсияи инфиродии қарзҳои бонкҳои кишвар ба сарвари давлат муроҷиат кунад. Соли гузашта тавассути бонкҳо барои истеҳсоли пахта ба хоҷагиҳои кишоварзӣ 140 млн. сомонӣ маблағҳои давлат ҷудо гардида буданд ва то имрӯз аз ин маблағ ҳамагӣ 33 дарсадаш ба хазинаи давлат баргардонида шудааст.

           

Дар мусоҳиба ба хабарнигори ОИ «Азия-Плюс»

 

директори Департаменти қарзи давлатӣ ва дороиҳои молиявии вазорат Темуралӣ Афғонов изҳор дошт, ки дар робита ба изҳороти Бонки миллии Тоҷикистон ва дигар бонкҳои кишвар доир ба дароз кардани мӯҳлати пардохти қарзҳои соли гузаштаи хоҷагиҳои пахтакор чунин тасмим пеш гирифта шуд. Лозим ба ёдоварист, ки мӯҳлати пардохти қарзҳои ба хоҷагиҳои пахтакор соли гузашта ҷудогардида 1-уми апрел ба охир расид. «Бо назардошти таъсири бӯҳрони молӣ ба соҳаи пахтакории ҷумҳурӣ, Вазорат аз сарвари давлат таъсиси комиссияи вижаи таҳлили вазъи воқеии ҳар кадоме аз бонкҳо ва реструктуризатсияи инфиродии қарзҳои ҳар як бонкро дар алоҳидлагӣ дархост хоҳад кард», – гуфт ӯ.

           

Т.Афғонов таъкид сохт, ки ба санаи 6-уми апрели соли ҷорӣ аз 140 млн. сомонии ба бонкҳо ҷудогардида барои қарз додан ба хоҷагиҳои пахтакор бо 12 фоизи солона ҳамагӣ 45,9 млн. сомонӣ ё худ 33 дарсади қарзи асосӣ ва 4,8 млн. сомонӣ ё худ 32 дарсад аз рӯи пардохти фоиз қарзҳо пардохт карда шудааст.

           

Ба гуфтаи Т.Афғонов, «Амонатбонк» аз 40 млн. сомонии қарз 19,4 млн. ва пардохти фоизи қарзҳо 1,2 млн. сомонӣ, «Агроинвестбонк» аз 50 млн. сомонӣ мутаносибан 18,7 млн. сомонӣ ва 2,8 млн. сомонӣ, «Тоҷиксодиротбонк» аз 5 млн. сомонӣ мутаносибан 2,5 млн. ва 390 ҳазор сомонӣ ва «Бонки рушди Тоҷикистон аз 5 млн. сомонӣ мутаносибан 3,3 млн. ва 428 ҳазор сомонӣ маблағҳои қарзи вазоратро баргардонидаанд. «Тоҷпромбонк» аз 5 млн. сомонии қарзи гирифтааш 2,1 млн. сомонӣ қарзи асосиро пардохт намуда, аз рӯи фоизҳои қарз ҳанӯз ҳеҷ маблағе напардохтааст ва аз 35 млн. сомонии қарзи «Ориёнбонк» низ то ҳанӯз ба вазорат маблағе ворид нагардидааст», – гуфт ӯ.

           

Директори Департаменти қарзи давлатӣ ва дороиҳои молиявии вазорат мегӯяд, соли ҷорӣ тавассути бонкҳо ба хоҷагиҳои пахтакор ҷудо кардани 180 млн. сомонӣ ба нақша гирифта шудааст, ки ин маблағ ба буҷаи давлатии соли 2009 дохил карда шудааст. «Вазорат ҷиҳати ихтсиос додани қарз бо ин мақсад аллакай бо «Ориёнбонк», «Тоҷиксодиротбонк» ва «Тоҷпромбонк» ба маблағи умумии 70 млн. сомонӣ созишномаи қарзӣ ба имзо расонида, рӯзҳои наздик 54 млн. сомонии он ихтисос дода мешавад», – -гуфт вай ва афзуд, ки фарқи асосии созишномаҳои кунунӣ аз қаблӣ дар он ифода меёбад, ки соли равон ҳар кадоме аз бонкҳо мувофиқи салоҳдиди хеш қарзҳои ҳукуматро миёни хоҷагиҳои деҳқонӣ тақсим хоҳанд кард.

Душанбе. 7-уми апрел. ОИ «Азия-Плюс» – Бо мақсади баргузории чорабиниҳои муштарак баҳри дифоъ аз ҳуқуқи муҳоҷирони меҳнатии тоҷик дар чаҳорчӯбаи татбиқи лоиҳаи «Рушди имконот ва табодули иттилоот бо мақсади тақвияти таъсири мусбати муҳоҷирати меҳнатӣ ба афзоиш ва рушди ҷамоатҳои деҳот» миёни Вазорати умури дохилии ҶТ ва Агентии ҳамкории техникӣ ва рушди


ACTED


Ёддошти ҳамкорӣ ба имзо расид.

Тавре аз Хадамоти муҳоҷирати ВКД ҶТ ба ОИ «Азия-Плюс» хабар доданд, ҳафтаи гузашта кормандони хадамот бо намояндагони созмонҳои ҷамъиятӣ ва ғайриҳукуматии муқими Тоҷикистон масъалаи роҳҳои ҳалли мушкилоти муҳоҷирони меҳнатии тоҷик дар қаламрави Русияро мавриди баррасӣ қарор додаанд.

Зикр гардид, ки роҷеъ ба баргузории таҳқиқоти илмии вазъи муҳоҷирони меҳнатии тоҷик дар Русия аз ҷониби созмонҳо ва хадамоти муҳоҷират тавофуқ ҳосил шудааст.

Душанбе. 7-уми апрел. ОИ «Азия-Плюс» – Имрӯз намояндагии Созмони ҷаҳонии беҳдошт ба Хадамоти ҷумҳуриявии назорати санитариву эпидемиологии назди Вазорати тандурустии ҶТ ба маблағи ҳудуди 80 ҳазор $ таҷҳизоти лабораторӣ тақдим кард.

Дар маросими супурдани таҷҳизот, ки аз 10 номгӯи техникаи тиббӣ ва 35 номгӯи реагентҳо иборат буд, роҳбари намояндагии СҶБ дар Тоҷикистон Сантино Северони, муовини вазири тандурустии ҷумҳурӣ Аъзам Мирзоев ва директори Хадамоти ҷумҳуриявии назорати санитариву эпидемиологии назди Вазорати тандурустии ҶТ Самариддин Алиев ширкат варзиданд.

 

Муовини вазири тандурстии ҷумҳурӣ Аъзам Мирзоев дар сӯҳбат бо хабарнигори ОИ «Азия-Плюс» изҳор дошт, ки таҷҳизоти тақдимгардида барои ташхиси дақиқи ҳама гуна бемориҳои сироятӣ пешбинӣ шудааст.

Душанбе. 7-уми апрел. ОИ «Азия-Плюс» – Имрӯз дар Остона рӯзи гиромидошти хотираи сарбозони фавтидаи қазоқ ҳангоми ҷанги шаҳрвандӣ дар марзи Тоҷикистону Афғонистон таҷлил мегардад. Маҳз ҳамин рӯз 14 сол қабл дар дараи Пшихарв дар муҳорибаи нобаробар 17 сарбози қазоқ ба ҳалокат расида буд.

Дар Тоҷикистон 23-юми декабри соли 2006 ба хотири гиромидошти сарбозони дар ин набард фавтида дар боғи «Дӯстӣ»-и шаҳри Душанбе лавҳаи ёдгорӣ бо номи 17 нафар сарбоз гузошта шуд ва имрӯз дар шаҳри Остона маросими ифтитоҳи хиёбони Хоираи 17 сарбози қазоқ баргузор мешавад.

Қобили зикр аст, ки аз моҳи декабри соли 1992 то моҳи августи соли 1999 ҳудуди 2 ҳазор хизматчии низомии Вазорати умури дохилии Қазоқистон дар ҳайати нерӯҳои ИДМ қитъаи марзи Тоҷикистону Афғонистон дар ноҳияи Қалаихумбро ҳимоят карда, 50 нафар ҷони худро аз даст доданд. Рӯзи 7-уми апрели соли 1995 дар муҳорибаи шадиде, ки бо муҷоҳидин дар дараи Пшихарв ба вуқӯъ пайваст, якбора 17 нафар сарбози қазоқ ба ҳалокат расида, 33 нафари дигар ҷароҳатҳои вазнин бардошт.