Душанбе. 19-уми март. ОИ «Азия-Плюс» – Субҳи имрӯз президенти Тоҷикистон Эмомалӣ Раҳмон дар маросими ифтитоҳи Маркази барқарорсозии саломатии кӯдакон дар шаҳраки Шифои ноҳияи Ваҳдат ширкат варзид.

Тавре аз хадамоти матбуоти сарвари давлат хабар доданд, чанде баъдтар сарвари давлат ба корҳои сохтмонии роҳи оҳани «Ваҳдат-Ёвон, ки яке аз қисматҳои роҳи оҳани «Душанбе-Қӯрғонтеппа» мебошад, ҳусни оғоз хоҳад бахшид.

Ба гуфтаи иҷрокунандаи вазифаи сардори Раёсати ташкили хизматрасониҳои тиббӣ ба модарону кӯдакон ва банақшагирии оилаи вазорати тандурустии ҶТ Шералӣ Раҳматуллоев, барои корҳои таъмиру таҷдид ва муҷаҳҳазсозии маркази барқарорсозӣ 3,5 млн. сомонӣ маблағ хароҷот карда шудааст, ки 2,2 млн. сомонии он аз ҷониби Вазорати тандурустии ҶТ ҷудо гардидааст. Дар ин кор ҳамчунин Созмони ҷаҳонии беҳдошт ва Бунёди кӯдакони СММ (ЮНИСЕФ) низ саҳм гирифтанд.

Ш.Раҳматуллоев таъкид сохт, ки марказ бо тамоми дастгоҳу таҷҳизоти зарурӣ таъмин буда, дар он барои муолиҷаи пурсамари кӯдакони бемор ҳама шароитҳо фароҳам сохта шудаанд.

           

Душанбе. 19-уми март. ОИ «Азия-Плюс» – Дар Тоҷикистон аз 6 ҳазору 115 нафар шахсони бори нахуст ба бемории сил гирифторшуда 17 дарсадашро муҳоҷирони меҳнатӣ ташкил медиҳанд.

           

Чанде қабл дар нишасти матбуотӣ муовини вазири тандурустии ҶТ Соҳибназар Раҳмонов изҳор дошт, ки шумори муҳоҷирони меҳнатии гирифтор ба бемории сил ба 1 ҳазору 26 нафар расида, аксари онон ба бемории сили давомдор мубталоянд, ки он кӯшиши зиёд ва муолиҷаи дарозмуддатро тақозо менамояд. «Агар барои муолиҷаи беморӣ дар марҳилаи аввали гирифторӣ барои як нафар 48 доллари амрикоӣ хароҷот шавад, пас барои мубталоёни бемории давомдори сил ин маблағ ба 7 ҳазор доллари ИМА баробар буда, мӯҳлати табобат низ се маротиба зиёдтар мешавад», – гуфт ӯ.

           

С.Раҳмонов мегӯяд, барои муҳоҷирони меҳнатӣ ҳуҷҷати шакли ягонаи маълумотномаи тиббӣ дар бораи вазъи саломатӣ таҳия шудааст ва он соли равон тасдиқ хоҳад гардид.

 

           

Душанбе. 19-уми март. ОИ «Азия-Плюс» – Тарбиятгирандагони мактаб-интернат барои нобиноёни (филиали мактаби рақами 56-и ноҳияи Сино) шаҳри Душанбе Иди Наврӯзро бо сарпарастони худ – намояндагони дипломатии сафорати Ӯзбекистон дар ҶТ пешвоз гирифтанд.

           

Чӣ тавре ки аз сафорати Ӯзбекистон дар Тоҷикистон ба ОИ «Азия-Плюс» хабар доданд, ба ин муносибат дар мактаб бо иштироки волидайни тарбиятгирандагон ва намояндагони сафорат ҷамъомади ботантана ва консерт баргузор шуд.

           

Ба иттилои манбаъ, сафорати Ӯзбекистон соли дуввум аст, ки тарбиятгирандагони ин интернатро таҳти сарпарастии худ гирифта, мудом ба онҳо кӯмак мерасонад. «Ба сифати тӯҳфа намояндагони дипломатии Ӯзбекистон ба мактаб-интернат таҷҳизоти пухтани маҳсулоти нонӣ тақдим намуда, ҳамчунин бо маводи ғизоӣ, аз қабили орду макарон ва маҳсулоти қаннодӣ ёрӣ расониданд», – афзуд манбаъ.

Душанбе. 18-уми март. ОИ «Азия-Плюс» – Дар Тоҷикистон бо дастгирии Иттиҳоди Аврупо барои воситаҳои нақлиёт, ки бо ҳамлу нақли маҳсулоти зудвайроншаанда сарукор доранд, истгоҳи санҷишу ташхис ифтитоҳ мегардад.

Чӣ тавре ки аз намояндагии Комиссияи Аврупо дар Тоҷикистон ба ОИ «Азия-Плюс» хабар доданд, дар чаҳорчӯбаи лоиҳаи «Рушди марказҳои сертификатсионии таҷҳизот барои ҳамлу нақли маҳсулоти зудвайроншаванда дар Қазоқистон, Қирғизистон, Тоҷикистон ва Ӯзбекистон» баҳори соли ҷорӣ чаҳор чунин озмоишгоҳ ба фаъолият шурӯъ мекунанд. «Истгоҳи нахустин имрӯз дар Алмаато боз мегардад», – гуфт манбаъ.

Татбиқи лоиҳаи мазкур аз соли 2007 оғоз гардидааст.

           

Душанбе. 18-уми март. ОИ «Азия-Плюс» – Чанде қабл ҳукумати ИМА дар доираи ҳамкориҳои ҳкуматҳои Тоҷикистону Амрико ба марзбонони тоҷик ду автомашинаи КАМАЗ ва қисмҳои эҳтиётии онро тақдим кард.

           

Тавре аз сафорати ИМА дар Тоҷикистон ба ОИ «Азия-Плюс» хабар доданд, арзиши воситаҳои нақлиёт ва қисмҳои эҳтиётӣ ҳудуди 150 ҳазор доллари ИМА-ро ташкил медиҳад. «Воситаҳои нақлиёт ва таҷҳизоти супурдашуда барои дастгирии амалиёти ҳамарӯзаи марзбонон ҷиҳати дифоъи сарҳад ва роҳ надодан ба қочоқи маводи мухаддир пешбинӣ шудаанд», – гуфт манбаъ.

           

Қобили зикр аст, ки сафорати ИМА дар Тоҷикистон шурӯъ аз соли 1992 бо марзбонони тоҷик мунсибатҳои ҳамкориро ба роҳ мондааст.

           

Хуҷанд. 18-уми март. ОИ «Азия-Плюс» – Корҳои лоиҳаи мустаҳкамкунӣ ва тозакунии соҳили чапи обанбори Қайроққум тавассути маблағгузории Бонки халқии Қазоқистон дар ҳаҷми 30 млн. танга (840 ҳазор сомонӣ) анҷом ёфт.

           

Тавре сардори муассисаи механиконидашудаи сайёри рақами 41-и «Суғдобсохтмон» Ҳаким Раҳимов ба ОИ «Азия-Плюс» хабар дод, дар доираи татбиқи лоиҳа наҳрҳои обёришавандаи пойгоҳҳои обкашии «Маҳрам» тоза карда шуда, сарбанди муҳофизатӣ бунёд гардид, вале то ҳанӯз ҳамаи корҳо дар ин самт пурра анҷом наёфтаанд ва интизорӣ меравад, ки марҳилаи дуввуми амалисозии лоиҳа шурӯъ мешавад.

           

Ҳ.Раҳимов мегӯяд, зарурати татбиқи лоиҳа бар он асос ёфта буд, ки соҳилҳои обанбор аз шусташавӣ нигаҳдорӣ карда шаванд. «Чун қаъри обанор аз лойқа пур шудааст, аз ин рӯ, дар сурати аз сатҳи муқаррарӣ боло рафтни об, обзеркунии заминҳои корами соҳил аз эҳтимол дур набуд», – таъкид сохт ӯ.

Душанбе. 18-уми март. ОИ «Азия-Плюс» – Ҳафтаи сипаригашта дар шаҳрҳои Ваҳдату Кӯлоб дар мавзӯи «Дастоварди молиявии ту» оид ба омӯзиши банақшагирии молиявӣ дар оила маҷмӯи семинарҳо баргузор гашт.

Тавре ҳамоҳангсози Мактаби молия ва менеҷменти Франкфурт Олга Марианти ба ОИ «Азия-Плюс» хабар дод, кормандони мактаб дар ҳамдастӣ бо шарикон аз созмони ғайриҳукуматии «Гендер ва Рушд» бо мақсади баланд бардоштани сатҳи огаҳии мардум барои аҳолии ноҳияҳои дурдасти ҶТ як қатор тренингҳои олмӯзишӣ доир намуданд.

Ба гуфтаи ӯ, бо дастгирии молиявии муассисаи молияи «


VP


Лизинг»-и Олмон бо занони шаҳрҳои Ваҳдат ва Кӯлоб дар ин мавзӯъ чаҳор семинар гузаронида шудааст. «Дар семинар занон бо тарзи идораи даромаду хароҷот дар оила, таҳияи буҷаи оилавӣ, пасандоз барои ҳолатҳои фавқулодда ва дигар масъалаҳои марбут ба хароҷоти маблағи оилавӣ шиносоии амиқ пайдо карданд», – афзуд О.Марианти.

Душанбе. 18-уми декабр. ОИ «Азия-Плюс» – Раҳбарияти нерӯгоҳи Сангтӯда-1 то ҳанӯз аз пардохт нагардидани қарзи ширкати «Барқи тоҷик» изҳори нигаронии шадид мекунад.

Хабаргузории ИТАР-ТАСС бо истинод ба сарчашма аз ҶСК «Нерӯгоҳи Сангтӯда-1» иттилоъ медиҳад, ки ҳаҷми умумии қарзи ширкат дар назди нерӯгоҳ ба санаи 1-уми марти соли ҷорӣ беш аз 41 млн. сомониро ташкил додааст. Намояндаи раёсати сохтмон таъкид сохтааст, ки ҷониби Тоҷикистон барои пардохти маблағи истифодаи барқ аз нерӯгоҳ масъул аст.

Намояндагони ҶСК «Нерӯгоҳи Сангтӯда-1» изҳор доштаанд, ки ба дарозо кашидани мӯҳлати пардохти қарз аз ҷониби ширкати «Барқи тоҷик» ба пардохти саривақтии маоши сохтмончиёну коргарон ва мӯҳлати ба истифода додани агрегати чаҳоруму охирини нерӯгоҳ таъсири манфӣ мерасонад.