Душанбе. 13-уми январ. ОИ «Азия-Плюс» – Тоҷикистон ба дафтари кории Созмони ҳамкории Шанхай ҳамаи асноди марбут ба таъсиси Маркази минтақавии иттилоотиву таҳлилии мубориза бо маводи мухадирро дар заминаи Агентии назорати маводи нашъаовари назди президенти Тоҷикистон ирсол кардааст.

           

Зимни нишасти матбуотӣ директори агентӣ Рустам Назаров изҳор дошт, ки феълан Маркази иттилоотиву ҳамоҳангсозии мубориза бо муомилоти ғайриқонунии маводи мухаддир дар Осиёи Марказӣ таъсис дода шудааст. «Интизор меравад, ки дар фурсати наздиктарин лоиҳа мавриди амал қарор мегирад ва айни замон мутахассисон барои кор дар марказ интихоб карда мешаванд», – гуфт ӯ.

           

Дар нишасти матбуотӣ зикр гардид, ки соли гузашта шумори нашъамандон дар ҷумҳурӣ ба 68 нафар афзуда, ба санаи 1-уми январи соли 2009 шумори онҳо 8 ҳазору 660 нафарро ташкил медиҳад. Тибқи маълумоти пешакии Вазорати тандурустии кишвар, аз миқдори умумии нашъамандон 442 нафарашон занон буда, 79,4 дарсади онҳо ҳероин ва 56,7 дарсади нашъамандон тариқи сӯзандору маводи мухаддирро истеъмол мекунанд.

Реклама на asia+

Душанбе. 12-уми январ. ОИ «Азия-Плюс» – Тибқи маълумоти расмӣ, тайи 11 моҳи соли ҷорӣ шумораи шаҳрвандони Тоҷикистон, ки ба гумони даст доштан дар нигаҳдорӣ ва қочоқи маводи мухаддир дар кишварҳои узви Иттиҳоди Давлатҳои Мустақил боздошт гардиданд, ду баробар коҳиш ёфта, 287 нафарро ташкил намуд, ки ин нисбат ба соли 2007 ба миқдори 234 нафар камтар аст.

Имрӯз дар ҷараёни як нишасти матбуотӣ раиси Оҷонсии назорати маводи мухаддири кишвар – Рустам Назаров ҳамчунин хабар дод, соли гузашта дар доираи созишномаҳои миёни Тоҷикистону Русия ба имзо расида, дар ҳудуди кишвар намояндагони Хадамоти федеролии назорати маводи мухаддири Русия ба фаъолият оғоз карданд.

Р.Назаров афзуд, ки аксаран дар ВАО оид ба боздошти шаҳрвандон ё гурӯҳи қочоқчиёни маводи мухаддир аз Тоҷикистон иттилоъ интишор мегардад, вале ҳангоме агентӣ аз он манбаъ барои ирсоли маълумот дархост исрол менамояд, маълум мешавад, ки онҳо шаҳрвандони Ҷумҳурии Тоҷикистон набудаанд.

Реклама на asia+

           

Душанбе. 12-уми январ. ОИ «Азия-Плюс» – Тибқи маълумоти сохторҳои мубориза бо маводи мухаддири Афғонистон, соли гузашта дар ин кишвар истеҳсоли маводи мухаддир ба миқдори 500 тонна коҳиш ёфта, 7,7 тоннаро ташкил дод.

           

Директори Агентиии назорати маводи нашъаовари назди президенти Тоҷикистон Рустам Назаров зимни нишасти хабарӣ изҳор дошт, ки аз рӯи таҳлили доирнамудаи агентӣ, маълум шудааст, ки дар минтақаҳое, ки таҳти назорати ҳукумати Афғонистон қарор надоранд, истеҳсоли маводи нашъавоар афзудааст.

           

Ба иттилои агентӣ, дар ин минтақа то 80 дарсади маводи мухддири кишвар истеҳсол мешавад. «Феълан 18 музофоти Афғонистон, аз ҷумла Тахору Қундузу Балх, ки бо Тоҷикистон ҳамсарҳаданд, аз маводи мухаддир озод эълон карда шуда, маводи нашъаовар аслан дар музофоти ҷануби кишвар тайёр карда мешавад», – гуфт Р.Назаров.

           

Р.Назаров афзуд, ки айни замон дар Афғонистон тамоили афзоиши истеҳсоли маводи мухаддири бангдона ба мушоҳида мерасад ва хулосабарорӣ оид ба «тағйирёбии куллии» истеҳсоли маводи мухаддир дар ин кишвар ҳанӯз барвақт аст.

Реклама на asia+

           

Душанбе. 12-уми январ. ОИ «Азия-Плюс» – Шаҳрвандони тоҷики дар Аштархон аз ҷониби мақомоти ҳифзи ҳуқуқ боздоштшуда қурбони саҳлангории хеш гаштаанд.

           

Дар мусоҳиба бо хабарнигори ОИ «Азия-Плюс» сафири кабири Тоҷикистон дар Русия Абдулмаҷид Достиев изҳор дошт, ки шаҳрвандони мо бо нақзи қонунгузории Русия таваасути пардохти маблағи муайяне ба қаллобон дар шиносномаҳои худ мӯҳри сохтаи тамдиди будубош дар Русияро гузоштаанд.

           

Сафир мегӯяд, вақтҳои ахир чунин амали қаллобӣ дар Русия роиҷ гардидааст ва мақомоти ҳифзи ҳуқуқи Русия бо мақсади ошкор сохтани саркардагони чунин аъмол тартиби шадиди тафтиши асноди шаҳрвандони хориҷиро ҷорӣ сохтаанд. «Аз ин рӯ, натанҳо шаҳрвандони Тоҷикистон, балки шаҳрвандони дигар кишварҳо низ метавонанд дар ин робита боздошт шаванд», – гуфт ӯ.

           

Ба гуфтаи А.Достиев, тибқи моддаи 327, банди 3-и КҶ Русия, парвандаҳои боздоштшудагон дар муддати як ҳафта баррасӣ шуда, шояд онҳо ба маблағи каме беш аз 2 ҳазор рубл ҷаримабандӣ шаванд ва сипас ба онҳо ҳуҷҷатҳои зарурӣ барои бозгашт ба ватан дода хоҳад шуд.

Сафир таъкид сохт, ки шаҳрванд М.Зайналов бо лақаби Ҷоник ё Шамшод роҳбари гурӯҳи ҷиноятпеша набуда, мақомоти ҳифзи ҳуқуқ ӯро чун тарҷумон истифода мебурдаанд ва ӯ бо маблағи муаяйн ба муҳоҷирон барои будубош вагони худро иҷора медодааст. «Сарфи назар аз ин, ба ман маълумотҳое ошкор гаштанд, ки ӯ дар байни намояндагони мақомоти ҳифзи ҳуқуқ ва боздоштшудагон чун миёнарав даст ба амалҳои номақбул задааст, – идома дод сафир. – Гузашта аз ин, аз 10 нафар ҷабрдида ба мо аз болои М.Зайналов аризаи шикоятӣ расид ва ман ба намояндагони Вазорати умури дохилӣ ва дипломати дар Аштархон қарордоштаи ҷумҳурӣ супориш додам, ки аз ин хусус мақомоти ҳифзи ҳуқуқро огаҳ сохта, аризаҳоро ба додситонӣ супоранд ва шояд пас аз ин ба қазия рӯшанӣ андохта шавад».

Дар ҳамин ҳол, ба ОИ «Азия-Плюс» муяссар шуд, ки бо яке аз муҳоҷирони боздоштшуда дар Аштархон тамос бигирад. Муҳоҷир бо ному насаби Анвар Ризвонов гуфт, онҳоро аз қатора пиёда намуда, ба Аштархон овардаанд, вале касе онҳоро гаравгон нагирифтааст. Танҳо шахсеро бо лақаби Ҷоник ё Шамшод ба онҳо муаррифӣ сохтаанду шарҳ додаанд, ки ӯ метавонад ба маблағи 25 ҳазор рубл мушкилоташонро ҳал созад. Ризвонов бо боварӣ изҳор менамояд, ки ба ӯ ҳодисаҳои бо пардохти чунин маблағ бидуни монеъа ба ватан фиристодани муҳоҷирон маълум аст. Ба гуфтаи ӯ, онҳоро 1-уми январ аз қатора пиёда сохтаанд ва имрӯз ӯ бо 11 нафар ҷабрдидаи дигар бепулу воситае барои рӯзгузаронӣ дар он ҷо қарор дорад.

Дар давраи аз 23-уми декабр то 4-уми январ мақомоти ҳифзи ҳуқуқи Русия барои дар шиносномаҳо ҷой доштани мӯҳрҳои қалбакӣ 16 муҳоҷири тоҷикро аз қатора пиёда сохтаанд.

 

Реклама на asia+