Дар Тоҷикистон Муассисаи давлатии “Маркази ягонаи реклама барои шабакаҳои телевизионӣ ва радиоӣ” таъсис ёфтааст, ки ҳадафи он танзим ва ба тартиб даровардани пахши таблиғ ё реклама дар телевизион ва радиоҳо мебошад. Дар ин бора имрӯз, 26-уми январ, Носир Саидзода, раиси Кумитаи телевизион ва радио зимни нишасти матбуотӣ хабар дод.

Номбурда гуфт, ки қарори ҳукумат дар бораи таъсиси ин марказ рӯзи 2-юми январи соли равон №1 қабул шуд ва он дар назди Кумитаи телевизион ва радио таъсис меёбад.

“Ҳадаф ин аст, ки пахши таблиғ дар телевизион ва радиоҳо бояд ба танзим дароварда шавад. Ин маркази ягона ҳамаи рекламаҳоро қабул мекунад ва баъдан, ба ҳар як шабакаи телевизионӣ ва радиое, ки мизоҷ мехоҳад, пахш мешавад”, – гуфт Носир Саидзода.

Ба таъкиди ӯ, ин муассиса ҳам ба танзим ва омода кардани таблиғ машғул мешавад ва ҳам таблиғотро ба талаботе, ки барои телевизонҳо мувофиқ аст, баррасӣ мекунад.

ИЗОБРАЖЕНИЕ Носир Саидзода

Ба гуфтаи Носир Саидзода ин марказ барои мизоҷон аз ҷумла чунин имкониятҳоро фароҳам меорад:

– Сарфаи вақти мизоҷон. Дигар ба идора ё телевизион омадани онҳо муҳим нест ва аз коргоҳ ё хона метавонанд маводи худро ба марказ тариқи онлайн пешниҳод кунанд;

– Тариқи онлайн дар бораи пахши таблиғи худ маълумот дарёфт кунад. Дар ин баробар тариқи паёмаки телефон низ дар бораи пахши маводи таблиғотӣ ба онҳо маълумот ирсол мешавад.

Ӯ гуфт, ки яке аз вазифаҳои марказ ба танзим даровардани забони таблиғот аст, ки ба таъкиди вай, ин мушкил дар рекламаҳое, ки имрӯзҳо дар телевизионҳо пахш мешавад, ҷой дорад.

Ба иттилои манбаъ, ҳоло низомномаи марказ пурра омода нашудааст ва дар наздиктраин фурсат он омода ва пурра ба фаъолият оғоз мекунад.

Чанд соли охир, бархе сокинон ва корбарони шабакаҳои иҷтимоӣ нигаронӣ мекунанд, ки рекламадаҳиндагон ба пахшу нашри рекламаҳо бо забони русӣ бартарӣ медиҳанд. Худи таблиғдиҳандагон мегӯянд, огаҳиҳо бо забони тоҷикӣ чандон таваҷҷуҳро ҷалб намекунад.

Бо ин вуҷуд, таҳлилгарон мегӯянд, бозори рекламаи Тоҷикистон ҳарчанд аз таблиғоту огаҳиҳои тиҷоратӣ ғанӣ аст, вале ҳамоно дар муқоиса ба бозори рекламаи кишварҳои минтақа даромади камтар дорад ва он танзим нашуда, зери инҳисори радио ва телевизионҳои давлатӣ қарор дорад. 

Дар Telegram, Facebook ва Instagram бо мо бимонед.

ЧОРАБИНИҲОИ МУҲИМ

– Имрӯз дар Тоҷикистон нишастҳои матбуотӣ оғоз мегарданд ва мансабдорон дар назди хабарнигорон аз фаъолияти яксолаи худ ҳисобот медиҳанд. Дар рӯзи аввали нишастҳои матбуотӣ дар вазорату идораҳои зерин нишасти матбуотӣ баргузор мегардад:

Дар Вазорати фарҳанг соати 08:00, дар Кумитаи телевизион ва радио соати 09:00, Агентии хизмати давлатӣ соати 10:00, Академияи идоракунии давлатӣ соати 11:00, Кумитаи бехатарии озуқаворӣ соати 14:00, дар Донишгоҳи давлатии тиббӣ, Донишгоҳи давлатии омӯзгорӣ ва дар Донишгоҳи техникӣ соати  08:00.

ЯК РӮЗИ ТАЪРИХ

Соли 1963 – Фурудгоҳи нави "Душанбе" ба кор оғоз кард.

Соли 2004 – Гвардияи Президент ба Гвардияи миллии Тоҷикистон табдили ном кард.

Соли 2011 – Ҳукумати Тоҷикистон барои издивоҷ бо хориҷиён маҳдудият ҷорӣ кард.

Соли 2015 – Президенти Тоҷикистон пешниҳод кард, ки соли 2015 дар ҷумҳурӣ “Соли оила” эълон карда шавад.

Соли 2016 – Ҳукумат ширкати “Тоҷик Эйр”-ро аз Фурудгоҳи пойтахт ҷудо карда, онро ба феҳристи корхонаҳои тобеи Вазорати нақлиёт ворид кард.

Соли 2017 – Эмомалӣ Раҳмон, раисҷумҳури Тоҷикистон аз нав Президенти Кумитаи миллии олимпии Тоҷикистон интихоб гардид.

Соли 2019 – Рустами Эмомалӣ. раиси шаҳри Душанбе қарореро имзо кард, ки тибқи он ҳамаи кормандоне, ки дар бозорҳо, марказҳои савдо, марказҳои хизматрасонии маишӣ, мағозаҳо ва нуқтаҳои хӯроки ҷамъиятӣ фаъолият мекунанд, новобаста аз шакли моликият, бояд бо либоси ягонаи корӣ таъмин бошанд.

Соли 2021 – Эмомалӣ Раҳмон дар паёми солонаи худ ба парлумони кишвар изҳор дошт, ки дар кишвар коронавирус вуҷуд надорад, вале хоҳиш кард, ки дар бораи пӯшидани ниқоб фаромӯш накунанд. Ҳамчунин, вай супориш дод, ки деҳқонон аз пардохти андози заминӣ барои як сол озод карда шаванд.

Соли 2023 – Дар Тоҷикистон фаъолияти ТҶ "Маркази мустақил оид ба ҳимояи ҳуқуқи инсон", ки пештар ба шаҳрвандон кумаки ҳуқуқии ройгон мерасонд, қатъ гардид.

ШАХСИЯТҲО

Соли 1935 – Рӯзи таваллуд ва даргузашти Наримон Бақозода, шоири бачагонаи тоҷик.

ИЗОБРАЖЕНИЕ Наримон Бақозода

Наримон Бақозода барои кӯдакону наврасон як силсила шеъру достон офаридааст, ки дар маҷмӯаҳои “Гулдара”, “Шеърҳо, афсонаҳо, чистонҳо”, “Сурнайчӣ”, “Оши ҳалол”, “Чӣ хуш аст?”, “Дафтари мо – кони панҷ” ва ғайра фароҳам омадаанд.

Ҳамчунин ӯ муаллифи аввалин либреттои операи бачагонаи тоҷик “Хонаи заргӯшбибӣ” ва драмаҳои “Бузаки ҷингилапо”, “Бахтатро бедор кун” аст.

Ӯ хатмкардаи факултети таъриху филологияи Университети давлатии Тоҷикистон ба номи В. И. Ленин буда, чанд муддат дар рӯзномаи “Тоҷикистони Советӣ” ва сипас мудири шуъбаи адабиёти бачагон ва наврасони Нашриёти “Ирфон” буд. Баъдан дар вазифаҳои сардабири шуъбаи филмҳои ҳуҷҷатии “Тоҷикфилм”, сармуҳаррири Кумитаи давлатии Тоҷикистон оид ба кинематография, котиби масъули маҷаллаи “Машъал”, муовини аввали раиси Кумитаи Тоҷикистонии муҳофизати сулҳ ва мудири Тоҷикистонии Хазинаи сулҳ кор кардааст.

Вай аз охири солҳои 1960 ба навиштани ашъор барои кӯдакон ва мақолоти мухталиф дар бораи адабиёт ва фарҳанг дар рӯзномаҳои Тоҷикистон оғоз кард. Ин шоири маъруф, ки бештари мардуми Тоҷикистон ӯро аз кудакӣ бо хондани ашъораш дар китобҳои дарсӣ мешиносанд, аз оғози фаъолияти адабии худ ба мавзуи кӯдакон алоқа дошт.

Китобҳои “Сайри боғи даҳ адад” ва “Алифбои дилкушо” аз охирин осори Наримон Бақозода ҳастанд, ки ахиран дар дастраси хонандагон шуданд.

Ӯ 26-уми январи соли 2009 дар рӯзи мавлудаш бар асари сактаи қалб аз олам даргузашт.

Соли 1973 – Зодрӯзи Ҷасур Халилов, оҳангсоз, роҳбари бадеии гурӯҳи “Авесто”.

ИЗОБРАЖЕНИЕ Ҷасур Халилов

Ӯ хатмкардаи Донишкадаи давлатии санъати Тоҷикистон ба номи М. Турсунзода буда, аз соли 2008 омӯзгори кафедраи эстрадаи Консерваторияи миллии Тоҷикистон ба номи Т.Сатторов аст. Ӯ намояндаи насли ҷавонтарини композиторони Тоҷикистон аст. 

Соли 1995 – Рустами Қосим, овозхони тоҷик дар 25-солагӣ даргузашт.

ИЗОБРАЖЕНИЕ Рустами Қосим

Рустами Қосим дар оилаи ҳунарманд ба дунё омада, аз овони кӯдакӣ ба мусиқӣ шавқи беандоза дошт ва сурудҳои халқӣ ва тӯёна иҷро мекард. Ин буд, ки халқ ӯро “Рустамча” мегуфтанд. Модараш ба ӯ аввал дуторнавозиро омӯхта буд, баъдан ба ӯ аккордеон харида, оҳангҳои навро ба ӯ меомӯхт.

Ӯ 26-уми январи соли 1995 дар Душанбе ҳангоми хобаш ба қатл расонида шуд. Сабаби марг ва аз ҷониби кӣ кушта шуданаш то ҳол маълум нест.

Соли 2018 – Султон Наврӯзов, файласуф, доктори илмҳои фалсафа дар 78-солагӣ даргузашт.

ИЗОБРАЖЕНИЕ Султон Наврӯзов

Ӯ солҳои 1968–1976 – муаллим, муаллими калон ва дотсенти кафедраи фалсафа, солҳои 1976–1988 – мудири кафедраи атеизми илмӣ ва солҳои 1988–2011 – мудири кафедраи фалсафаи Донишгоҳи миллии Тоҷикистон буда, аз соли 2011 то охирин нафас ба ҳайси профессори кафедраи фалсафаи Донишгоҳи миллии Тоҷикистон фаъолият доштанд.

Наврӯзов муаллифи 29 монографияву рисола ва зиёда аз 100 мақолаи илмӣ буда, таҳқиқоти илмиаш ӯ ба масоили қобилияти инсонӣ робита дорад. Аз ҷумлаи намоёнтарин ҷустуҷӯҳои илмии Султон Наврӯзов рисолаи доктории ӯ «Қобилияти инсон (ҷанбаи иҷтимоӣ – фалсафӣ)» мебошад, ки дифои он дар Маскав соли 1992 сурат гирифт. Файласуфони номии рус ба самараи таҳқиқоти ӯ баҳои баланд дода, вобаста ба натиҷагириҳои беназираш сазовори унвони доктори илмҳои фалсафа донистанд. Маҳз дар мавзӯи қобилияти инсон профессор Султон Наврӯзов 4 ҷилд китоби пурмазмун ва даҳҳо мақолаҳои илмӣ иншо намудааст.

САНАҲОИ МУҲИМИ ҶАҲОНӢ

Ҳамасола, 26 январ дар ҷаҳон Рӯзи байналмилалии гумрук таҷлил мешавад.

ИЗОБРАЖЕНИЕ

Дар ҳамин рӯзи соли 1953 дар Брюссел нахустин иҷлосияи Шӯрои ҳамкориҳои гумрукӣ баргузор шуд, ки соли 1994 номи кунунии худ – Созмони ҷаҳонии гумрукро гирифт. Пас аз 30 сол, соли 1983, ин рӯз ҳамчун ҷашни ҳамасолаи Рӯзи байналмилалии гумрук интихоб шуд. Дар ҳоли ҳозир, Созмони ҷаҳонии гумрук 185 кишварро дар узвияташ дорад, ки беш аз 98% тамоми тиҷорати байналмилалиро идора мекунанд.

Имрӯз Рӯзи умумиҷаҳонии маданияти экологӣ таҷлил мешавад. Эъломияи Стокҳолм, ки соли 1972 дар Конфронси СММ оид ба проблемаҳои экологӣ қабул шуда буд, такони асосии рушди маърифати экологӣ маҳсуб мешавад. Дар конфронс бори нахуст консепсияи рушди устувор мавриди баррасӣ қарор гирифта, дар эъломия 26 принсипи ҳифзи муҳити зист номбар шудааст, ки то имрӯз риоя мешаванд.

ИЗОБРАЖЕНИЕ

Ҳадафҳои асосии Рӯзи умумиҷаҳонии маданияти муҳити зист нишон додани аҳамияти таълими экологӣ ҳамчун як фанни илмӣ аст, ки ҷанбаи иҷтимоии мушкилоти экологиро таъкид мекунад ва ба рушди огоҳӣ, дониш, малака ва ҳавасмандии зарурӣ барои ҳал ва пешгирии ин мушкилот нигаронида шудааст.

26 январи соли 1924 Петроград ба Ленинград ивази ном кард. Баъди вафоти Ленин карор дода шуд, ки ба Петроград исми Ленинград дода шавад. Шаҳр ба номи таърихиаш – Санкт-Петербург соли 1991 баргашт.

ИЗОБРАЖЕНИЕ

Соли 1905 дар ҳамин рӯз дар Африқои Ҷанубӣ бузургтарин алмоси ҷаҳон истихроҷ карда шуд. Дар кони “Премер” бузургтарин алмос дар таърихи инсон кашф карданд, ки вазнаш 621,2 грамм буд.

ИЗОБРАЖЕНИЕ

Он ба шарафи кашфкунанда ва соҳиби кон, Томас Куллинан “Куллинан” номида шуд. Соли 1907 ин санг ҳамчун тӯҳфа ба шоҳи Англия Эдвард VII чун аломати оштӣ пас аз ҷанги Бур тақдим карда шуд. Ҳоло арзиши аслии “Куллинан” ба арзиши 94 тонна тилло баробар аст.

26 январи соли 1500 аврупоиҳо бори аввал ба хоки Бразилия қадам гузоштанд. Муваффақияти кашфкунандаи ҳудудҳои ба Бразилияи муосир мансуб ба Висенте Янес Пинзон, баҳрнавард, сайёҳ ва конкистадори испанӣ тааллуқ дорад.

ИЗОБРАЖЕНИЕ

Висенте Янес Пинзон солҳои 1492-1493 дар экспедитсияи якуми Кристофер Колумб ба ҷаҳони нав иштирок карда буд. Соли 1499 ӯ ба саёҳати мустақил, ба соҳилҳои Америкаи Ҷанубӣ баромад. Киштии ӯ ба тӯфон дучор шуд ва 26 январи соли 1500 дар соҳили давлати муосири Бразилия – Пернамбуко ба поён расид.

ВАЗЪИ ҲАВО*

Дар вилояти Суғд – Ҳавои тағйирёбандаи бебориш пешгӯӣ шуда, дар баъзе ноҳияҳои тормеғ мефарояд. Ҳарорат: дар водиҳо рӯзона 0+5º гарм, дар ноҳияҳои кӯҳӣ рӯзона 0-5º сард, дар водиҳо шабона -2+3º, дар ноҳияҳои кӯҳӣ шабона 7-12º сард.

Дар вилояти Хатлон – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: дар водиҳо рӯзона 2+7º гарм, дар ноҳияҳои доманакӯҳӣ рӯзона 1+6º гарм, дар водиҳо шабона -3+2º, дар ноҳияҳои доманакӯҳӣ шабона -4+1º.

Дар шаҳру ноҳияҳои тобеи ҷумҳурӣ – Ҳавои тағйирёбандаи бебориш пешгӯӣ шуда, дар ноҳияҳои алоҳида тормеғ мефарояд. Ҳарорат: дар водиҳо рӯзона 1+6º гарм, дар ноҳияҳои кӯҳӣ рӯзона 1-6º сард, дар баъзе ноҳияҳо то 2+4º гарм, дар водиҳо шабона 0-5º сард, дар ноҳияҳои кӯҳӣ шабона 2-7º сард, дар баъзе ноҳияҳо то 11-13º сард.

Дар Вилояти Мухтори Кӯҳистони Бадахшон – Ҳавои тағйирёбанда, дар баъзе ноҳияҳои ғарбии вилоят барф борида, дар шарқи вилоят бебориш дар назар аст. Ҳарорат: дар ғарби вилоят рӯзона -1+4º, дар шарқи вилоят рӯзона 10-15º сард, дар баъзе минтақаҳо то 7-9º сард, дар ғарби вилоят шабона 6-11º сард, дар баъзе ноҳияҳо то 1-3º сард, дар шарқи вилоят шабона 23-28º сард, дар баъзе минтақаҳо то 17-19º сард.

Дар шаҳри Душанбе – Ҳавои  тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 5+7º гарм, шабона 1-3º сард.

Дар шаҳри Хуҷанд – Ҳавои тағйирёбандаи бебориш пешгӯӣ мешавад. Ҳарорат: рӯзона 0+2º гарм, шабона 0-2º сард.

Дар шаҳри Бохтар – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 3+5º гарм, шабона 0-2º сард.

Дар шаҳри Хоруғ – Ҳавои тағйирёбандаи бебориш пешгӯӣ мешавад. Ҳарорат: рӯзона -1+1º мешавад. Ҳарорати ҳаво шабона 6-8º хунук, рӯзона 0+2º гарм мешавад.

*Ҳарорати шабонаи ҳаво шаби 26 ба 27-уми январ ба ҳисоб гирифта шудааст.

Дар Telegram, Facebook ва Instagram бо мо бимонед.

ЧОРАБИНИҲОИ МУҲИМ

– Имрӯз соати 17:00 дар Театри давлатии академии опера ва балети ба номи С. Айнӣ операи афсонавии “Алеко” ба саҳна гузошта мешавад. Он бар пояи асари А.С. Пушкин навишта шудааст. Арзиши чиптаҳо 33 сомонӣ буда, дар хазинаи театр ва сомонаи echipta.tj дастрас мебошанд.

– Имрӯз соати 11:00 дар Театри давлатии Лухтак намоишномаи “Шоҳдухтари шӯх” дар таҳияи коргардон Зафар Ҷавадов намоиш дода мешавад. Ҳодисаҳои асар дар замонҳои қадим, дар Шарқ, дар кишвари афсонавии Қандин рух медиҳанд. Ним соат пеш аз оғози спектакл дар толори ошёнаи якум барои тамошобинони хурдсол шоу-консерт бо лӯхтакҳо баргузор мегардад.

ИЗОБРАЖЕНИЕ

Нархи чипта 25 сомонӣ буда, дар хазинаи театр ва сомонаи ticketon.tj дастрасанд.

ЯК РӮЗ ДАР ТАЪРИХ

Имрӯз дар Тоҷикистон Рӯзи кормандони соҳаи меҳнат ва ҳифзи иҷтимоии аҳолӣ таҷлил мегардад.

Соли 1996 – Дар назди Кумитаи ҳолатҳои фавқулодаи Тоҷикистон воҳиди махсуси наҷотдиҳӣ таъсис дода шуд, ки ҳадафи он анҷом додани корҳои наҷотдиҳӣ ва расонидани кумак дар ҳолатҳои фавқулода мебошад.

Соли 2001 – Эмомалӣ Раҳмон, раисҷумҳури Тоҷикистон “Дар бораи таъсиси Раёсати хизмати давлатии назди Президенти Ҷумҳурии Тоҷикистон” фармон ба имзо расонид.

Соли 2007 – Президенти Тоҷикистон бо вазири маорифи Эрон масъалаҳои омӯзиш ва таълими забони форсиро дар Тоҷикистон баррасӣ карда буд.

Соли 2012 – Агентии назорати давлатии молиявӣ ва мубориза бо коррупсия гурӯҳи қочоқбаронро ошкор намуд, ки ба таркиби он кормандони мақомоти ҳифзи ҳуқуқ шомил буданд.

Соли 2016 – Палатаи поёнии парлумони Тоҷикистон пешниҳод дар бораи ҳазфи калимаи "Қонуни асосӣ"-ро аз матни Конститутсия тасдиқ намуда, лоиҳаи тағйиротро ба Суди конститутсионӣ ирсол кард.

Соли 2017 – Қарори Ҳукумати кишвар дар бораи қоидаҳои барасмиятдарорӣ, додани раводид ва раводиди электронии Тоҷикистон ба шаҳрвандони хориҷӣ ва шахсони бешаҳрвандӣ ба имзо расид.

Соли 2021 – Дар бозори “Султони Кабир” дар шаҳри Душанбе сӯхтор ба амал омад.

ШАХСИЯТҲО

Соли 1951 – Зодрӯзи Ҷаҳон Азонзод, ғизошинос ва доктори илмҳои тиб.

Соли 1960 – Зодрӯзи Ҷумъаи Толиб, рӯзноманигори тоҷик.

ИЗОБРАЖЕНИЕ Ҷумъа Толиб

Дар пайи нашри мақолаҳои интиқодӣ мақомоти қудратӣ ӯро дар соли 2004 8 моҳ зиндонӣ карданд. Пас аз он боз ба рӯзноманигорӣ баргашт. Солҳои 2004—2005 мухбири махсуси Маркази тадқиқоти журналистӣ дар водии Зарафшон. Солҳои 2005—2006 директори иҷроияи Маркази тадқиқоти журналистӣ. Солҳои 2007—2008 директори Оҷонсии иттилоотии «Зарафшон-таймс».

Аз соли 2008 директори Бюрои маслиҳатдиҳӣ, сухансанҷӣ ва тадқиқоти журналистӣ, ҳамзамон, аз моҳи марти соли 2009 сармуҳаррири ҳафтаномаи ҷамъиятиву сиёсии «Пайкон» буд.

Ҷумъабой Толибов бар асари бемории саратон18 ноябри 2011 дар деҳаи Испағни ноҳияи Айнӣ даргузашт.

Соли 1966 – Зодрӯзи Фаррух Ҳамрализода, сафири пешини Тоҷикистон дар ИМА ва ҳоло муовини аввали вазири корҳои хориҷии Тоҷикистон.

ИЗОБРАЖЕНИЕ Фаррух Ҳамрализода

Фаррух Ҳамрализода, ки моҳи ноябри соли гузашта муовини якуми вазири корҳои хориҷӣ таъин шуд, пеш аз ин сафири Тоҷикистон дар ИМА буд. Ӯ пештар низ дар мансабҳои баланди давлатӣ кор кардааст, аз ҷумла муддате раиси Кумитаи давлатии сармоягузорӣ, вазири рушди иқтисод ва савдо ва мушовири давлатии президенти Тоҷикистон оид ба сиёсати иқтисодӣ буд.

Донишгоҳи давлатии олии техникии ба номи Баумани шаҳри Маскав дар риштаи муҳандис-механик таҳсил кардааст. Баъди хатми таҳсил дар соли 1991, дар Кумитаи давлатии иқтисод ба фаъолият оғоз карда, аввал мутахассиси шуъбаи сиёсати зиддиинҳисорӣ ва рушди соҳибкории хурд ва баъдан сармутахассиси шуъбаи ислоҳоти иқтисодӣ ва рушди инфрасохтори бозорӣ таъин шудааст. Аз соли 1994 то соли 1995 муовини сардори шуъбаи пешгӯии иқтисодии Вазорати иқтисод ва робитаҳои иқтисодии хориҷии Тоҷикистон ва як соли баъдӣ муовини сардори шуъбаи ислоҳоти иқтисодии ин вазорат буд.

Ҳамрализода соли 1996 сардори Раёсати рушди минтақаҳо ва баъдтар сардори Раёсати пешгӯӣ ва рушди минтақаҳои Вазорати иқтисод ва робитаҳои иқтисодии хориҷӣ таъин шудааст.

Номбурда соли 1999 ба Маркази идораи лоиҳа дар соҳаи маориф ба кор омада, то соли 2005 дар вазифаҳои мутахассис оид ба харид, муовини директор ва директори ин идора кор карда, ду соли баъдӣ дар Вазорати рушди иқтисод ва савдои Тоҷикистон фаъолият кардааст.

Фаррух Ҳамрализода соли 2007 ба Дастгоҳи иҷроияи президенти Тоҷикистон омад ва мудири Шуъбаи ислоҳоти иқтисодӣ ва сармоягузорӣ таъин шуд. Ҳамзамон роҳбарии Лоиҳаи таҷдиди низоми идораи давлатиро ба уҳда дошт.

Ҳамрализода аллакай баъди як соли фаъолият дар ин ниҳод, соли 2008 раиси Кумитаи давлатии сармоягузорӣ ва идораи амволи давлатии Тоҷикистон ва соли 2009 Вазири рушди иқтисод ва савдо таъин шуд. То соли 2012 дар ин мансаб буд ва панҷ соли баъдӣ мушовири давлатии президенти Тоҷикистон оид ба сиёсати иқтисодӣ  ва баъди тағйири ном кардани ин ниҳод, ёрдамчии президент оид ба масъалаҳои иқтисодӣ буд.

Фаррух Ҳамрализода соли 2017 раиси Палатаи ҳисоби Тоҷикистон ва соли 2018 дубора раиси Кумитаи давлатии сармоягузорӣ ва идораи амволи давлатии Тоҷикистон таъин шуд.

Соли 1978 – Ҳабибулло Назаров, арбоби давлатӣ дар 70-солагӣ аз олам даргузашт.

ИЗОБРАЖЕНИЕ Ҳабибулло Назаров

Ҳабибулло Назаров 15 августи соли 1907 зода шуда, аз соли 1935 дар сохторҳои гуногуни мақомоти ҳуқуқи кишвар ба фаъоляит пардохт. Як муддат Вазири адлия ва раиси Додгоҳи олии Тоҷикистон буд.

Ҳабибулло Назаров дар ин баробар ба кори эҷодӣ рӯ оварда, маҷмуаҳои “Барои сулҳ”, “Қалами озод”, “Бахти ҷовидон”-ро таълиф намуд.

Баъдан қиссаву романҳояш низ мунташир шуданд. Ӯ дар ҳаммуаллифӣ бо Ҷалол Икромӣ романи ҳаҷвии “Саргузашти Сафармахсум”-ро эҷод кардааст. Як қатор асарҳояш саҳнагузорӣ низ шудаанд.

Соли 2020 – Дар шимоли Тоҷикистон Фотима Мирзоқулова, солхӯрдатарин зани кишвар, ки охири асри XIX таваллуд шуда буд, дар синни 127-солагӣ даргузашт.

Соли 2023 – Мирзо Муллоаҳмад, адабиётшинос ва эроншиноси тоҷик дар синни 74-солагӣ даргузашт.

ИЗОБРАЖЕНИЕ Мирзо Муллоаҳмадов

Мирзо Муллоаҳмад адабиётшинос ва эроншиноси шинохта буда, перомуни масъалаҳои гуногуни адабиёт, забон, таърих ва фарҳанги тоҷику форс ва роҷеъ ба адибони даврони мухталиф тадқиқот анҷом додааст.

Ба қалами ӯ беш аз 450 асари илмӣ тааллуқ дорад. Ӯ дар бораи эҷоди бузургони классик, аз ҷумла Рӯдакӣ, Фаррухӣ, Қоонии Шерозӣ, Носири Хусрав ва дигарон таҳқиқотҳо анҷом дода, китобҳои алоҳида таълиф ва ё намунаҳои осори онҳоро мураттаб кардааст. Ӯ дар баргардони осори бисёр шоиру нависандагони эронӣ ва пажӯҳиши эҷоди онҳо низ саҳм дорад.

САНАҲОИ МУҲИМИ ҶАҲОНӢ

25 январи соли 1755 Донишгоҳи давлатии Маскав (МГУ) таъсис ёфтааст, ки ҳамасола ин сана таҷлил мешавад. Донишгоҳи давлатии Маскав ба номи М.В. Ломоносов бузургтарин донишгоҳи Русия маҳсуб мешавад, ки дар он донишҷӯён аз минтақаҳои гуногуни кишвар ва хориҷа таҳсил мекунанд. 

ИЗОБРАЖЕНИЕ

Аз ҷумла, 6 майи соли 2009 дар шаҳри Душанбе Филиали Донишгоҳи давлатии Маскав ба номи М.В. Ломоносов таъсис ёфт.

25 январи соли 1908 дар Боку аввалин маротиба намоиши операи “Лайлӣ ва Маҷнун”, ки аз ҷониби оҳангсози маъруф Узеир Ҳоҷибеков эҷод шудааст, баргузор шуд. Ин рӯйдод боиси рушди минбаъдаи санъати опера дар минтақа ва оғози таърихи операи озарбойҷонӣ гардид.

Опера дар асоси достони ишқи фоҷиавии Лайлӣ ва Маҷнун, ки аз ҷониби шоири форс-тоҷик Низомии Ганҷавӣ дар асри XII навишта шудааст, таҳия гардидааст. Ин достон дар адабиёти Шарқ мақоми баланд дошта, дар фарҳангҳои гуногун таъсири амиқ гузоштааст.

ИЗОБРАЖЕНИЕ

25 январи соли 1949 аввалин маротиба ҷоизаи телевизионии амрикоии “Эмми” супорида шуд. Ин ҷоиза дар чандин бахш тақдим мешавад, аз ҷумла “Беҳтарин филми саҳнавӣ”, “Беҳтарин филми мазҳакавӣ”, “Беҳтарин филми кутоҳ”, “Беҳтарин ҳунарманди синамо”, “Беҳтарин барномаи аниматсионӣ” ва ғайра.

ИЗОБРАЖЕНИЕ

ВАЗЪИ ҲАВО*

Дар вилояти Суғд – Ҳавои тағйирёбанда, дар водиҳо бебориш, дар баъзе ноҳияҳои доманакӯҳию-кӯҳи барф борида, дар ноҳияҳои алоҳида тормеғ мефарояд. Ҳарорат: дар водиҳо рӯзона 0+5º гарм, дар ноҳияҳои кӯҳӣ рӯзона 0-5º сард, дар водиҳо шабона -2+3º, дар ноҳияҳои кӯҳӣ шабона 7-12º сард.

Дар вилояти Хатлон – Ҳавои тағйирёбанда пешгӯӣ шуда, дар баъзе ноҳияҳо барф борида, дар ноҳияҳои алоҳида тормеғ мефарояд. Ҳарорат: дар водиҳо рӯзона 2+7º гарм, дар ноҳияҳои доманакӯҳӣ рӯзона 1+6º гарм, дар водиҳо шабона -3+2º, дар ноҳияҳои доманакӯҳӣ шабона -4+1º.

Дар шаҳру ноҳияҳои тобеи ҷумҳурӣ – Ҳавои тағйирёбанда пешгӯӣ шуда, дар баъзе ноҳияҳо барф борида, дар ноҳияҳои алоҳида тормеғ мефарояд. Ҳарорат: дар водиҳо рӯзона 1+6º гарм, дар ноҳияҳои кӯҳӣ рӯзона 1-6º сард, дар баъзе ноҳияҳо то 2+4º гарм, дар водиҳо шабона 0-5º сард, дар ноҳияҳои кӯҳӣ шабона 2-7º сард, дар баъзе ноҳияҳо то 11-13º сард.

Дар Вилояти Мухтори Кӯҳистони Бадахшон – Ҳавои тағйирёбанда пешгӯӣ шуда, дар баъзе ноҳияҳои ғарбии вилоят барф борида, дар шарқи вилоят бебориш дар назар аст. Ҳарорат: дар ғарби вилоят рӯзона -1+4º, дар шарқи вилоят рӯзона 10-15º сард, дар баъзе минтақаҳо то 7-9º сард, дар ғарби вилоят шабона 6-11 º сард, дар баъзе ноҳияҳо то 1-3º сард, дар шарқи вилоят шабона 23-28º сард, дар баъзе минтақаҳо то 17-19º сард. 

Дар шаҳри Душанбе – Ҳавои  тағйирёбанда, рӯзона асосан бебориш (0,0-0,5мм) пешгӯӣ мешавад. Ҳарорат: рӯзона 5+7º гарм, шабона 1-3º сард.

Дар шаҳри Хуҷанд – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 0+2º гарм, шабона 1-3º сард.

Дар шаҳри Бохтар – Ҳавои тағйирёбандаи бебориш пешгӯӣ шуда, тормеғ мефарояд. Ҳарорат: рӯзона 5+7º гарм, шабона 1-3º сард.

Дар шаҳри Хоруғ – Ҳавои тағйирёбанда пешгӯӣ шуда, дар баъзе ҳолатҳо барф меборад. Ҳарорат: рӯзона -1+1º, шабона 9-11º сард.

*Ҳарорати шабонаи ҳаво шаби 25 ба 26-уми январ ба ҳисоб гирифта шудааст.

Дар Telegram, Facebook ва Instagram бо мо бимонед.