Бар асари тирпарроние, ки субҳи имрӯз, 16-уми сентябр, дар чанд мавзеи марзии Тоҷикистону Қирғизистон, оғоз гардид, як сарбози тоҷик кушта ва чанд нафари дигар ҷароҳат бардоштаанд.
Сокинони ҷамоати Ворухи шаҳри Исфара бо тасдиқи ин хабар ба “Азия-Плюс” гуфтанд, миёни аҳолии осоишта низ ҷароҳатбардоштагон ҳастанд.
Дар ҳамин ҳол, расонаҳои қирғизиӣ бо такя ба Вазорати тандурустии ин кишвар хабар медиҳанд, ки дар пайи тирпаронии имрӯза 11 низомии қирғиз ҷароҳат бардоштанд.
Расонаҳои Қирғизистон бо такя ба КДАМ ин кишвар аз баргузории эҳтимолии гуфтушунидҳо байни раисони вилоятҳои Ботканту Суғд хабар медиҳанд.
Ҳамзамон, як манбаъ аз ВКХ ба “Asia-Plus” гуфт, ки чанде пештар вазири корҳои хориҷии Тоҷикистон Сироҷиддин Муҳриддин ва ҳамтои қирғизаш Жээнбек Кулубаев дар сӯҳбати телефонӣ вазъ дар марзро баррасӣ карданд.
Дар хусуси муҳтавои ин суҳбат ҳоло тафсилоти бештар дода намешавад.
Дар ҳамин ҳол, хабаргузории “24kg” менависад, ки ҷониби Қирғизистон бори дигар зарурати ҳалли мушкилоти марзӣ бо роҳи сиёсӣ-дипломатиро таъкид намудааст.
Пас аз суҳбати телефонии вазирони корҳои хориҷии ду кишвар, Вазорати корҳои хориҷии Қирғизистон дар робита ба даргирии имрӯза дар сарҳади ду кишвар ба ҷониби Тоҷикистон нотаи эътирозӣ супоридааст.
Ҳамчунин, расонаҳои қирғиз бо такя ба КДАМ-и Қирғизистон хабар медиҳанд, ки чанде пештар роҳбарони Қӯшунҳои сарҳадии ду кишвар Раҷабалӣ Раҳмоналӣ ва Уларбек Шаршеев бо мақсади қатъи оташ ва роҳ надодан ба доман паҳн кардани даргирӣ, суҳбати телефонӣ анҷом додаанд.
Ҷонибҳо тавофуқ ҳосил кардаанд, ки шурӯъ аз соати 10:00 оташбас эълон карда мешавад.
Ёдовар мешавем, ки субҳи имрӯз, 16-уми сентябр, якбора дар чанд минтақаи сарҳадии Тоҷикистону Қирғизистон даргирии нав рух дод.
