Ситоди ҷумҳуриявӣ оид ба пурзӯр намудани чораҳои зиддиэпидемикӣ барои пешгирии интиқол ва пайдоиши сирояти нави коронавирус (COVID – 19) дар Ҷумҳурии Тоҷикистон 27 март дар бораи иҷозаи баргузор намудани тӯйи домодию арусӣ бо иштироки то 100 нафар бо риоя намудани чорабиниҳои беҳдоштӣ ва зиддиэпидемикӣ қарор қабул кард.
Тавре АМИТ “Ховар” хабар медиҳад, ин қарор бо дарназардошти дар қаламрави кишвар беҳтар гардидани вазъи санитарию эпидемиологӣ вобаста ба сирояти коронавирус рӯйи кор омадааст.
Гуфта мешавад, мутобиқи қарори мазкур, вазорату идораҳо, ташкилоту муассисаҳо ва корхонаҳо муваззаф гардиданд, ки сарфи назар аз тобеияти идорӣ ва шакли моликият, инчунин, шахсони воқеӣ барои риоя намудани муқаррароти қарори мазкур чораҳои зарурӣ андешанд.
Ғайр аз ин, Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва мақомоти иҷроияи маҳаллии ҳокимияти давлатӣ вазифадор гардиданд, ки ҷиҳати таъмин ва риоя намудани чорабиниҳои беҳдоштӣ ва зиддиэпидемикӣ тадбирҳои заруриро роҳандозӣ намоянд.
Тайи соли ахир ба тӯйи домодию арӯсӣ даъвати на зиёдтар аз 30-40 нафар меҳмонон иҷоза шуда буд.
Моҳи апрели соли гузашта маросими баргузории тӯйҳои домодию арӯсӣ муваққатан боздошта шуда, аввали тобистони соли 2020 Ситоди ҷумҳуриявӣ дар бораи баргузории тӯйҳо бо ҳузури доираи маҳдуди одамон қарор қабул кард, яъне дар ин маросим метавонистанд танҳо аъзои оила ва пайвандони наздики хонавода иштирок кунанд ва бо шумори танҳо 30-40 нафар.
Қаблан “Азия-Плюс” дар маводи худ доир ба ин масъала зикр карда буд, ки дар Тоҷикистон тақрибан ҳама маҳдудиятҳои замони ҳамагирии коронавируси COVID 19 бекор шуд, ба ҷуз маҳдудият дар шумораи ширкаткунандагони тӯйи домодиву арӯсӣ. Баъзе моликони тарабхонаҳо ва созмондиҳандагони тӯйҳо чунин изҳори назар карда буданд, ки шояд Ситоди ҷумҳурявӣ ин тарафи масъаларо фаромӯш карда бошад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
