Дар шаҳри Хуҷанд духтари 20-солае боздошт гардид, ки бо автомашинааш раҳгузареро пахш намуда, аз ҷойи ҳодсаи ғайб зада буд.
Тавре ба ОИ «Азия-Плюс» корманди хадамоти матбуоти Раёсати ВКД ҶТ дар вилояти Суғд Акбар Шарифов хабар дод, шоми рӯзи панҷшанбеи ҳафтаи равон зимни ҳаракат дар роҳи кӯчаи ба номи Раҳмон Набиеви шаҳри Хуҷанд ронандаи автомашинаи тамғааш номаълум аз уҳдаи идораи воситаи нақлиёт набаромада, сокини 30-солаи шаҳрро, ки дар канори роҳ қарор дошт, пахш мекунад ва аз ҷойи ҳодиса ғайб мезанад.
«Ронанда дарҳол ҷойи ҳодисаро тарк намуда, ба Д.Шамсиддинови осебдида кӯмак нарасонид ва баъдан ахирӣ ба бемористон мунтақил гардид», – гуфтанд дар раёсат.
Ба иттилои манбаъ, баъди муддати начандон зиёд ба гумони даст доштан дар ин амал ронандаи автомашинаи тамғаи «БМВ», ҷавонзани 20-сола, сокини ноҳияи Бобоҷон Ғафуров Мадина Холбекова боздошт шудааст.
Зимнан зикр гардид, ки бобати нисбати боздоштшуда боз кардани парвандаи ҷиноӣ мутобиқи моддаҳои риоя накардани қоидаҳои ҳаракат дар роҳ ва дар ҳолати хатарнок гузоштани ҷабрдида чораҷӯӣ мешавад.
