Як қатор ширкатҳои фароҳамсози Интернети Тоҷикистон дастрасӣ ба шабакаи маъруфи иҷтимоии Facebook-ро қатъ намуданд. Гуфта мешавад, ин амал бо супориши шифоҳии Хадамоти алоқаи назди ҳукумати ҶТ сурат гирифта, вале аз ҷониби хадамоти мазкур он ба ҳеҷ гунае шарҳ дода намешавад.
Бино ба маълумоти як сарчашами ОИ «Азия-Плюс» дар яке аз ширкатҳои фароҳамсози Интернет, ба чанде аз ширкатҳо шоми дирӯз ин супориш расида, дастрасӣ ба Facebook-р қатъ намудаанд, вале дар ҳамин ҳол, чанд ширкати дигар ба иҷрои супориши Хадамоти алоқа имрӯз ҳам шитоб надоранд.
Сабаби ба чунин амал даст задани идораи Бег Зуҳуров на ба ширкатҳои фароҳамсози Интернет маълум асту на ба журналистон.
Ёдрас мекунем, ки ин бори дуюм аст, ки дар Тоҷикистон дастрасӣ ба сомонаи Facebook қатъ мегардад. Бори нахуст 3-уми майи соли равон Хадамоти алоқа аз ширкатҳои фароҳамсози Интернет даъват ба амал оварда буд, ки дастрасӣ натанҳо ба торнамои Facebook, балки ба чанде аз дигар сомонаҳо, аз қабили Zvezda.ru, Tjknews.com ва Maxala.org-ро низ қатъ созад, вале баъди як ҳафта дастрасӣ ба ин шабакаи иҷтимоӣ барқарор шуда, шумори корбарони шабака ба маротиб афзуд. Тӯли соли равон аз ҷониби Хадамоти алоқа ҳамчунин якчанд маротиба дастрасӣ ба сомонаи news.tj (ОИ «Азия-Плюс») низ қатъ гардида, торнамоҳои Lenta.ru, Ferghananews.com, Pamir-vesti.ru, оҷонсии «Озодагон», видеохостинги You Tube ва ғайра мавриди ин амали Хадамоти алоқа қарор гирифта буданд.
