Ҷасади халабони тоҷик, ки зимни суқути ҳавопаймо ба ҳалокат расида буд, ба ватан ирсол гардид.
Бино ба маълумоти сафоратхонаи Тоҷикистон дар Русия, сафорати Тоҷикистон дар Ҷумҳурии Мисри Араб дар ҳамоҳангӣ бо Сафорати Федератсияи Россия дар Ҷумҳурии Судон ва ниҳодҳои дахлдори судонӣ корҳои заруриро анҷом дода, 23 ноябри соли ҷорӣ ҷасади Акрам Ҳошимов тавассути Доҳа ба Москва оварда шуд.
Ба иттилои манбаъ, дар робита ба масъалаҳои қабули тобут дар Москва, пайдо кардани пайвандони Акрам ва роҳӣ кардани он ба Ватан аз сӯйи Сафорати Ҷумҳурии Тоҷикистон дар Федератсияи Россия мусоидатҳои лозима сурат гирифта, ҷасад, шоми 24 ноябр, тавассути хатсайри Домодедово – Хуҷанд ба Тоҷикистон фиристода шуд.
Таври маълум, 19 августи соли равон, ҳавопаймои Ан-26-и мансуб ба ширкати судонии «Алфа 1», ки ҳайъати ҳукуматии Судон дар он буд, ҳангоми фуруд омадан дар ноҳияи шаҳри Талоди (воқеъ дар иёлоти Кордофани Ҷанубӣ, Судон) суқут кард.
Дар ҷойи ҳодиса сӯхтор ба вуҷуд омада, ҳамаи 32 мусофир, аз ҷумла яке аз сарнишинон, шаҳрванди Ҷумҳурии Тоҷикистон Ҳошимов Акрам (7 майи 1969 зода шудааст, бошандаи шаҳри Чкаловски вилояти Суғд) ҳалок гардиданд.
