Чанде қабл мулоқоти роҳбарияти Хадамоти муҳоҷирати назди Ҳукумати Ҷумҳурии Тоҷикистон бо фаъолону раисони ҷамоат ва директорони мактабҳо, раисони маҳаллаҳо ва шахсони масъули ноҳияи Ҳисор баргузор гардид.
Тавре аз Шуъбаи робита бо ҷомеаи Хадамоти муҳоҷирати назди ҳукумати ҶТ хабар доданд, дар вохӯрӣ сардори Хадамоти муҳоҷирати назди ҲҶТ Девонаев С.А., муовини сардори Хадамоти муҳоҷирати назди ҲҶТ С.Абдулло., раиси ноҳия Ҳисор Солеҳов Б.Т., роҳбари Намояндагии Хадамоти Федералии муҳоҷирати ФР Себелев В.В., инчунин роҳбари Намояндагии Хадамоти муҳоҷирати назди ҲҶТ дар ФР Одинаев А.Т. ва як қатор кормандони масъулони ХМнҲҶТ иштирок доштанд.
Нахуст раиси ноҳия Ҳисор Солеҳов Б.Т., ташрифи меҳмонон ба ноҳияи шодмони Ҳисорро хайрамақдам гуфта, риштаи суханро ба сардори Хадамоти муҳоҷират дод.
Сардори Хадамоти муҳоҷират пас аз муаррифии кормандони Хадамот доир ба самтҳои асосии фаъолияти Хадамот сухан намуда, диққати ҳозиринро ба самти касбомӯзӣ, забономӯзии ҷавонон ва пешгирии ноболиғон ҳангоми сафар ба хориҷа ҷалб намуд.
Мавсуф зикр намуд, ки “муҳоҷирати меҳнатӣ ҳамчун падида, таърихи ҳазорсола дорад ва дар ҳамаи давру замон ин раванд буд, ҳаст ва боқӣ мемонад.
Сафиало Девонаев афзӯд : «Маҳз барои ҳалли ин масъалаҳо, бо дастгирии бевоситаи Президенти Ҷумурии Тоҷикистон Ҷаноби Олӣ, мӯтарам Эмомалӣ Раҳмон 5-уми октябри соли 2012 дар рафти сафари кории Президенти Федератсии Россия Путин В. В. ба Ҷумурии Тоҷикистон байни Хадамоти муҳоҷирати назди Ҳукумати Ҷумурии Тоҷикистон ва Хадамоти Федералии муҳоҷирати Россия Ёддошти тафоҳум оид ба иқдомҳо байни Ҷумҳурии Тоҷикистон ва Федератсияи Россия дар бораи рушди ҳамкориҳо дар соҳаи муҳоҷират ба имзо расид.
Дар ҷараёни ин сафар, ҳамчунин мӯҳлати бақайдгирии шаҳрвандон аз 7 ба 15 рӯз тамдид карда мешавад.
Ў қайд намуд, ки зимни баргузории Ҷаласаи 8-уми гурӯҳи кории Тоҷикистону Россия ҷонибҳо ба мувофиқа омаданд, ки то 10 феврали соли 2013 Созишномаи байни Ҳукумати Ҷумҳурии Тоҷикистон ва Ҳукумати Федератсияи Россия дар бораи ҷалби муташаккилонаи шаҳрвандони ҶТ ҷиҳати фаъолияти меҳнатии муҳоҷирон-шаҳрвандони Тоҷикистон дар ҳудуди Федератсияи Россия ва додани иҷозатнома барои кор ба муддати 3 солро таҳия ва ба имзо расонанд.
Дар ҷараёни вохӯрӣ ҳамчунин масъалаҳои пешгирии муҳоҷирати ғайриқонунӣ, баҳисобгирии муҳоҷирон-шаҳрвандони Тоҷикистон, шиносоӣ бо вазъи муҳоҷирони меҳнатии шаҳрвандони тоҷик дар хориҷи кишвар, сатҳи забондони муҳоҷирони меҳнатӣ, касбомӯзӣ, одобу русум, таърих ва фарҳанги кишварҳои қабулкунанда ва дигар масъалаҳои вобаста ба ин соҳа матраҳ гардид.
Лозим ба ёдоварист, ки мақсад аз ташкил ва дидору мулоқотҳои роҳбарияти Хадамоти муҳоҷират бо бошандагони ин ноҳия, танзими раванди муҳоҷирати меҳнатӣ, будубоши шаҳрвандони хориҷӣ ва бурдани корҳои фаҳмондадиҳӣ ва иттилоотӣ байни аҳолӣ ва муҳоҷирони меҳнатӣ мебошад.
Дар фарҷоми мулоқот саволу ҷавоб доир ба самтҳои фаъолияти Хадамоти муҳоҷират, намояндагиҳои он дар Федератсияи Россия, забономӯзӣ, касбомӯзӣ, масъалаи сафари ноболиғон ба ФР ва нигарониҳое, ки дар ин самт вуҷуд дорад, инчунин оид ба муҳокимаи умумӣ гузоштани қонун «Дар бораи муҳоҷират» ва таъсиси шӯъбаи Хадамоти муҳоҷират дар ноҳияи Ҳисор ва пурзур намудани самтҳои ҳамкориҳо бо раисони ҷамоат ва мактабҳо сурат гирифт.
